10,500 target na estudiantes sa school year 2024-2025

An Camarines Sur National High School (CSNHS) sa Ciudad nin Naga na saro sa mga may halangkaw na enrollees sa Kabikolan piglalaoman abot sa 10,500 an mapalistang estudiantes alagad posibleng maglangkaw depende sa nagpapadagos na enrollment para sa school year 2024-2025.

An ibang estudiantes nagbabalyong escuelahan mantang dakul na an mga public high school sa ibang mga banwaan. Magigirumduman kan mga nakaaging school year nag-abot sa 11,400 an saindang enrollees.

An main campus kan escuelahan sa Barangay Peñafrancia mantang an extension sa M.T. Villanueva Avenue na iguang labi sa sangatos na classrooms para sa ribo-ribong estudiantes, sabi ni Principal Dr. Sulpicio Alferez III.

Padagos na an saindang preparasyon sa pagbubukasan nin klase sa Hulyo 29, 2024 susog sa pigtalaan kan Department of Education.

Huli kan halangkaw na enrollees cada school year igua nin night classes nganing gabos na estudiantes makalaog sa saindang public school.

Haros 70 por ciento kan mga estudiantes digdi hale pa sa ibang mga municipalidad.

Sinabi pa kan principal piglalaoman ninda na dakul an maparticipar na mga magurang asin iba pang sektores sa pigtalaan na nationwide Brigada Eskwela na mapoon sa Hulyo 19 nganing sa premirong aldaw kan klase malinig asin andam na an mga classrooms.