121K rehistradong mga botante sa Naga

Igua nang total na 121,773 an rehistradong botantes sa Ciudad nin Naga matapos kan pinakahuring Election Registration Board (ERB) hearing kan ika-duwang semana kan Oktubre 2024 na nagserne kan mga calificadong botante nganing makaparticipar sa mid term elections sa Mayo 2025.

Si Atty. Maico Julia Jr., Election Officer kan ciudad nagsabi sa mga ginibo nindang ERB hearing kabale si mga binasura sa listahan iyo an 287 gadan na, 552 na nagbalyong ibang mga banwaan o ciudad, 15 nagrehistro sa overseas asin 229 double registrant.

An voter’s registration nagpoon kan Febrero 12, 2024 asin nagsara kan Septiembre 30, 2024 alagad dai na pinalawig kan Comelec mantang pig-aandam kan ahencia iyo an masunod na pirilian.

An ERB kumpuesto kan Election Officer bilang chairman, mga miembros iyo an pamayo kan Civil Registrar Office asin pamayo kan Department of Education (DepEd) kan ciudad.

An ciudad na kumpuesto nin 27 barangay iguang 145 clustered classroom na kaipuhan an 435 paratukdo na maserbe sa aldaw kan borotohan.