2 aspiranteng alcalde sa Lagonoy CamSur, binasura kan Comelec

Duwa na sana an maglalaban sa cargong alcalde sa eleksyon sa Mayo 12, 2025 sa Lagonoy, Camarines Sur matapos ibasura kan Commission on Election (Comelec) central office an candidatura kan duwang asperante na sinda Joseph Señar Pilapil asin Christian Neri Pilapil.

An duwa parejong nagsangat pa nin motion for reconsideration alagad sa en banc decision ibinasura man giraray huli ta parejong mga ‘‘Nuisance Candidate’’ na dagos nang kinancelar an saindang candidatura.

Kasunod kan naging desisyon kan Comelec hale sa dating apat na magraralaban sa cargong alcalde, sinda Rafael Genoroso Bona III na kaalyado ni Gobernador Luige Villafuerte asin Dyego Luis Pilapil na kaalyado ni Diputado Arnie Fuentebella iyo an magsasabatan sa eleksyon sa Mayo 2025.

An pagkakadeclara kan Comelec komo mga nuisance candidate an duwang Pilapil naging paborable sa candidatura sa asperanteng si Dyego Luis Pilapil huli ta dai na makakaapekto sa birilangan nin boto.

Si Pilapil, aki ni outgoing Mayor JB Pilapil. An isyu sa ‘‘political dynasty’’ iyo an tuyaw sa sainda kan mga kalaban sa politica.

Sa ralaban sa cargong bise alcalde, segurado na an kapangganahan kan ka-tandem ni Pilapil na si incumbent Vice Mayor Jerry Jake Remoto huli ta mayong kalaban mantang mayong candidatong bise alcalde si Bona.