P260M na SLF lusot na sa SP

Matapos an halawig na mga deliberasyon sa Sangguniang Panlungsod kan Ciudad nin Naga sa propuestong P260 milyon na sanitary landfill (SLF) na-aprobaran man giraray sa sesyon regular sa aldaw nin mga puso, Febrero 14 matapos ipresentar kan Technical Working Group (TWG) an saindang pinal na feasibility study kan tatambakan basura sa Barangay San Isidro. Alagad kinakaipuhan magsumiter giraray kan saindang final report an TWG sa Sangguniang Panlungsod. Puponan tolos an proyecto sa paagi kan inicial na P25 milyon gikan sa Economic Development Fund alagad an kakulangan na P168 milyon sa P260M na cantidad kan proyecto posibleng utangon sa bangko defende sa fondo kan City Hall na hinahalat muna an recomendasyon kan Budget Office mientras na piglalaoman matatapos an SLF nurong taon asin target na maging operational sa Abril 2018, sabi ni Consejal Salvador Del Castillo, pamayo kan Committee on Environment. Nagkaperang veces nagpresentar kan saindang feasibility study an TWG na pinamamayohan ni City Planning Officer Willy Prilles asin sa sesyon kan Febrero 14 nagkulpa na si halawig na mga debate sa isyu kan fondo, pagpaconstruhir nin tinampo asin kun perang taon an buhay kan SLF. Pinaboran kan SP an propuesto kan TWG sa Option B – na gagamiton an 4.85 hektaryang lote na gagastosan nin P260M asin an buhay kaini malawig nin 10.3 taon mientras na iginilid na an Option A – para sana sa tolong taon na operasyon kan basurahan na gagastosan nin P203M alagad an buhay kaini sundo sana sa 2.8 taon. Sinabi ni Bise Alcalde Nelson Legacion dawa inabot nin perang bulan an pag-aadal kan TWG asin deliberasyon sa SP mas naging positivo an resulta huli ta napatama asin nagbaba pa si cantidad hale sa dating P273 milyon naghuros sa P260 milyon. Naka-minus pa nin tres kilometros sa halawig na distancia kan tinampo pasiring sa lugar kan SLF mabakal nin lote sa Sitio Langon pasiring sa zona siete kan Brgy. San Isidro, an lakdang na ini saro sa pigtulod ni Consejal Del Castillo nganing mapalipot an viaje kan mga dump truck asin makakatipid pa sa gasolina. An deliberasyon sa SLF pinunan kan Junio 2016 mientras na an TWG nagpuon sa pag-aadal kan propuestong proyecto kan Septiembre 2016 asin kan Enero 24, 2017 nagpresentar kan enot na ginibong feasibility study alagad sa aldaw kan mga puso, Febrero 14 nagkulpa na si dakul na mga kapotan sa miembros kan SP sagcod na pinaboran an pinakahuring feasibility study. Pakatapos kan sampulong taon na buhay kan SLF piglalaoman na marerealisar na an haloy nang pangiturogan na Waste to Energy Project, sabi pa ni Del Castillo. An Department of Environment and Natural Resources pigmamandohan an gabos na LGU na dapat magkaigwa nin sadiring SLF base sa Republic Act 9003 o mas midmid sa Ecological Solid Waste Management Act of 2000.