SABI KAN DOTr BIKOL: Modernisasyon kan Naga Airport poponan sa 2019

Aaboton pa nin sarong taon antes iimplementar kan Civil Aeronautics Aviation of the Philippines (CAAP) an re-orientation and modernization of Naga Airport mantang nagkua pa sana nin consultancy firm na iyo an magibo sa desinyo kan kaenterohan na airport complex, sabi kan opisina rehiyonal kan Department of Transportation (DOTr). Sa entrevista kan Bicol Mail ki Engr. Raul Basallote, Area Manager, Project Management Office kan DOTr Bikol ipinahayag kaini na an pigkuang consultancy firm kan CAAP iyo an mahaman kan desinyo kan bilog na airport complex na aaboton nin sarong taon antes matapos alagad saindang hinahagad na gibohon nin paagi na dai na aboton nin sarong taon. Nagpupoon pa sana ngonian na bulan nin Abril na igwa na sindang kasundoan sa time table mantang duwang taon nang nakakaagi downloaded na sa CAAP an inisyal na P1.00215 bilyon kaya ngani dai pa napaluwas nin dugang na fondo an Department of Budget and Management (DBM) para sa alokasyon sa taon 2017 asin 2018. Gamiton muna an enot na pig-download na fondo kan 2015 asin 2016 antes mapaluwas nin dugang na budget an DBM arog man kaini an pig-aadaptar sa proyecto kan Bicol International Airport sa Ciudad nin Legaspi, sabi pa kan area manager kan DOTr. An nahaman na desinyo kan consultancy firm iyo an i-aadaptar kan CAAP sa pag-implementar kan modernisasyon kan aeropuerto, sabi pa ni Basallote. An kaenterohan na budget sa modernisasyon kan aeropuerto nagcacantidad nin P3.53 bilyon asin igwa nang enot na pig-download sa Capitolyo Provincial kan Camarines Sur na pinaagi sa Memorandum of Agreement na nagcacantidad nin P402 milyon na pig-alokar kan taon pang 2015 para sa site acquisition para sa bagong airport site. An natatadang balanse para sa taon 2015 budget nagcacantidad P233 milyon. An proceso sa expropriation case sa land acquisition asin desinyo kan airport complex na piggigibo kan saindang pigkuang consultancy firm iyo nalang an pighahalat na iyo ini an dahilan kun dai tolos na-iimplementar an proyecto sa aeropuerto. Kan taon 2015, cantidad P402 milyon an pig-alokar para sa nagpapadagos na dumping nin daga sa site acquisition sa brgy. San Agustin na pig-iimplementar kan Capitolyo Provincial kan Camarines Sur, matapos mag-isyu nin writ of possession an corte alagad an nakaka-ulang iyo an pagcontra kan ibang grupo nin mga paraoma. Maabot sa 134 hektarya an gagamiton na lote para re-orientation project kan aeropuerto. Base sa time table kan DOTr an proyecto sa aeropuerto matatapos sa laog nin tolong taon poon na magsikad an contruksyon. (dpa)