Lalas nakapulot na sa Casureco II

Nagsakat na sa kategoryang Triple A an Camarines Sur II Electric Cooperative (Casureco II) alagad an designadong project supervisor digdi kan National Electrification Administration (NEA)magpapadagos sa puesto asin bako ining dahilan nganing bayaan na an manijamiento kan cooperativa. Pagpasipara ini sa pinasar na resolucion kan junta directiva kan Casureco II, mga LGUs kan Calabanga, Bombon asin Ciudad nin Naga na dapat kun bako nang ailing cooperative, dapat i-recall na kan NEA an pigdestinong project supervisor. Si Project Supervisor/Acting General Manager Engr. Nelson Lalas nagpahayag sa entrevista kan Bicol Mail na dai niya basta tutuwadan an manijamiento dawa declarado na bilang Triple A an Casureco II mala ngani saiyang pigtaong ehemplo si project supervisor kan NEA sa Camarines Norte Electric Cooperative (Canoreco) na pigdeclara bilang Triple A alagad inabot nin limang taon antes pig-recall kan saindang ahencia. Kumfirmado na saro nang Triple A an Casureco II asin an certificasyon itatao sa gigibohon na actividad sa aniversaryo kan NEA sa enot na semana kan Agosto, sabi pa ni Lalas. Pig-oorgullo kan PS/AGM na nagsakat an categorization kan Casureco II na nangyari sa saiyang administrasyon asin nalampasan niya an record sa nakaaging limang mga PS antes siyang nadestino digdi sa Ciudad nin Naga. Sa categorization kan NEA pasado an Casureco II sa Triple A huli naglangkaw an saindang collection efficiency nagsakat sa 96 por ciento hali sa dating 92 por ciento sana, sa system loss dating 14 por ciento ngonian naghuros na sa 12 por ciento. Afuera pa kaini, mayo na sindang problema sa lado finansyal mantang nakakabayad na nin amay sa mga power supplier, nakokolecta na si mga morosidad kan dakul na miembros-consumedores. An resulta kaini, magkakaigwa nin dugang na benipisyo an mga opisyales asin empleados kan cooperativa. PAGKURAPOT SA PUESTO NI LALAS CUESTIONABLE NA SA JUNTA An pagkurapot sa puesto ni Lalas sa Casureco II salongat sa ipapasar kuta nang resolucion kan junta directiva kan Mayo 22 na dapat ideclara nang bakante an posisyon na project supervisor/ general manager asin magdesignar na muna nin OIC GM hali sa laog kan manijamiento. Nagkaigwa nin executive session na pigkasurondoan na magpasar sinda nin resolucion na ideclara nang bakante an posisyon na PS/GM alagad kan magbalik sa board meeting iba na si timplada sa kasundoan sa executive session na presente an gabos na miembros asin an saindang pamayo na si director John Paul Sta Ana. Si Director Angelino Cornelio Jr. kan Naga North District iyo si naging movant sa resolucion na dapat bakantehon na an sinambit na posisyon alagad nagtaram si Lalas asin Sta Ana na envez kan propuestong resolucion halaton na muna an ipapaluwas na categorization kan Casureco II bilang triple A asin preparado na si Lalas na magpa-recall sa NEA. Si sinambit na board meeting disganado si Cornelio sa saiyang pag-iriba na biglang nagbirik kan saindang kasundoan sa executive session.