SA M.T. VILLANUEVA AVENUE Road widening proj dapat taposon sa Marso 2019

Kaipuhan taposon kan contratista an implementasyon kan road widening project sa M. T. Villanueva Ave., Ciudad nin Naga sa Marso 4, 2019 alagad dai makaderetsong patrabajo mantang an ibang kagrugaring nin mga ulang na estractura na yaon na sa laog kan road right of way dai man tolos nagcocooperar sa Department of Public Works and Highways. Ini an paliwanag kan DelPar Construction and Supply sa 2nd Engineering District kan DPWH sa Baras, Canaman, Camarines Sur kasunod kan reclamo nin mga motorista apesar na pigpunan an proyecto kan Hunyo 2018 alagad dai pang asegurasyon kun matatapos sa pigtalaan na target completion. Si Assistant District Engr. Richard Emmanuel Ragragio kan 2nd Engineering District nagpahayag man na kabale sa mga nakakaabala kan proyecto bako lang ulang na mga kudal asin residencia an dapat mahali alagad kabali pa an poon nin mga kahoy asin poste nin kuryente. Nagdagdagan pa kan orden kan corte na pinapundo an DPWH sa pagputol nin mga kahoy apesar may permit to cut sa DENR huli sa pigsangat na reclamo kan grupo nin environmentalist. An proyecto sa pagpahiwas nin mga tinampo kan national road sa Ciudad nin Naga enot nang binawi an fondo kan panahon ni DPWH Secretary Rogelio Singson huli kan mga pag-ulang kan grupo nin environmentalist na apektado an mga darakulang kahoy kun ipapadagos an road widening project. Alagad si Consejal Vidal Castillo, nagpadreno nin resolucion sa Sangguniang Panlungsod na hinuhurot sa DPWH Central Office na ibuelta an fondo sa mga pagpahiwas kan tinampo sa ciudad asin nakabale na an M.T.Villanueva Ave mala ngani narealisar na an proyecto. Si Castillo, pamayo kan Committee on Infrastructure sa SP nagsabi na dakulang bagay sa motorista kun mahiwas na an M.T.Villanueva mantang agihan ini nin mga motorista hali sa Tinambac, Calabanga, Magarao, Bombon asin Canaman orog na si mga estudiantes sa mga colegio sa Peñafrancia Ave. asin si iba pasiring sa Pili, Camarines Sur. Nagkapera nang kagrugaring kan mga ulang na estractura nagtugot nang ipagaba alagad igwa pang nagsisinutil. Kabali sa proyecto iyo an pagbugtak nin desague sa mag-ibong na gilid kan tinampo. Dinagdag pa ni Engr. Ragragio na ngonian na panahon nin tag-init nakatalaan ponan an implemetasyon kan road widening project sa kalabaan kan Magsaysay Ave sundo sa rutonda sa Brgy. Concepcion Grande. Igwa na sindang ginibong consultasyon sa mga apektadong kagrugaring nin propriedad asin saindang pinaliwanag na dapat maintindihan si yaon sa laog kan road right of way ciertong aagihan kan proyecto huli ta iyan sadiri kan gobierno. (dpa)