Klase sa UNC bukas sa Hulyo 1
Pigcoconsiderar kan University of Nueva Caceres (UNC) an pagbalyo nin burokasan nin klase hali sa dating bulan nin Hunyo envez sa Hulyo 1 poon ngonian na school year 2019-2020 alagad matalaan nin opisyal na pag-anuncio mientras na pig-aandam na an mga dokumento asin agenda.
Sa pag-atubang sa press conference kan Lunes, Marso 4 kan bagong Presidente kan universidad, Dr. Fay Lea Patria M. Lauraya sinabi kaini na saindang pigcoconsiderar an pagbalyo kan bulan nin burokasan nin klase sa Hulyo uno mientras na pig-aandam na an ‘‘school calendar and tentatively this is not official, we will make it official’’.
Kun marealisar an planong ini makakasabay na sinda sa ibang universidades sa nasyon na nagbalyo na kan saindang burokasan nin klase alagad an iba bulan nin Agusto.
Si Lauraya, nagkumfirmar na sa miembros kan media kan nakatalaan na investiture sa saiya bilang ika-apat na Presidente kan UNC na gigibohon ngonian na Marso 7, 2019 alas 3:30 nin hapon sa UNC Sports Palace.
Siya taga Daraga, Albay dati nang nagserbe bilang Presidente kan Bicol University (BU) sa laog nin walong taon.
An planong ini kan bagong liderato kan UNC masabay naman sa ibang universidad sa Manila alagad bakong bulan nin Hulyo envez Agusto.
Napag-araman sa ibang opisyal kan UNC Student Government dai pa sinda nag-aaram kan planong ini kan bagong liderato alagad hagad ninda na iconsulta man giraray sa estudiantes, alumni organization asin sa Parent Teachers Association (PTA).
An Commission on Higher Education (CHED) nakatalaan nang mag-implementar kan pagbalyo sa bulan nin Agusto kan burokasan nin klase sa mga pampublikong universidades asin mga colegio poon sa school year 2020.
An planong ini kan CHED na gibohon na kan gabos na mga pampublikong universidades na magpuon kan saindang enot na semestre sa Agusto tanganing maging facil na an saindang implementasyon kan Universal Acces to Quality Tertiary Education Act sa irarum kan cash-based budgeting system.
Sa Departamento de Edukasyon, sinabi ni Direktor Rehiyonal Dr. Guilbert Sadsad na an burokasan nin klase ngonian na school year 2019-2020 magpapadagos man giraray sa bulan nin Hunyo mientras na naghahalat sinda kan pinakahuring memorandum hali sa saindang opisina central.
An isyu sa climate change saro sa mayor na dahilan kan DepEd sa liderato ni Sekretarya Leonor Briones kun tano ta mantenido ninda an bulan nin Hunyo bilang iyo man giraray an burokasan nin klase.
An pagtulod sa pagbalyong bulan nin burokasan nin klase huli ta mawot kan Filipinas magsabay na sa darakulang institusyon sa ibang mga nasyon na napoon kan saindang academic calendar sa bulan nin Agusto o Septiembre. (dpa)