Viajeng CSur Legazpi City prioridad kan PNR

Sagcod pa sana sa survey sa Camarines Sur an ginigibo kan contratista sa iimplementar na P175 bilyon na railway system alagad an pigtatawan muna nin prioridad kan manijamiento kan Philippine National Railways sa Ciudad nin Naga iyo an pagbuelta kan viajeng Naga – Legazpi.

Si OIC Division Manager Antonio Bare Jr. kan Naga PNR Station nagpahayag na sainda nalang hinahalat an mga kotse na dadarahon digdi hali sa Manila nganing idagos na an viaje kan commuter train hali digdi pasiring sa Ciudad nin Legazpi.

Igwang mga bagong binakal an gobierno nin kotse para sa Manila alagad si dati nang ginamit asin gagamiton iyo an isasalya sa Bicol.

Enot nang pigplano na dapat kan Septiembre 2019 dadarahon na digdi an mga kotse alagad sagcod sa ngonian dai pa nakakaabot mantang dai pa aram kan lokal na manijamiento an kaulangan sa saindang opisina central.

An regular na viaje kan perrokaril haloy nang hinahalat kan mga Bicolano huli ta barato an flete kun ikukumpara sa pampasajerong bus asin man public utility van.

An namamantenir sana sa presente kan lokal na manijamiento kan PNR iyo an regular na viaje kan commuter train haling Sipocot sundo sa Ciudad nin Naga asin pabuelta sa PNR Sipocot.

Barato tarifa kun haling Naga abot sa Sipocot cantidad sanang P32.00, haling Naga abot sa Libmanan cantidad sanang P22.00 asin Naga sundo sa Pamplona nagcacantidad sana nin P12.00, igwa pang discuento an estudiantes asin senior citizens.

An administrasyon ni Presidente Duterte nag-utang sa China nin P175 bilyon para sa construksyon kan bagong railway system haling Tutoban, Manila abot sa Sorsogon.

Maabot sa 639 – kilometro an railway line para sa PNR South Long-Haul project asin target na marealisar an proyecto sa 2022 na mapalipot kan oras sa viajeng Bicol-Manila. (dpa)