CSur nasa red alert vs ASF
ANIMAL CHECKPOINT. Dai man narerealisar an pigsasabing 24/7 na pigbugtak na check point contra ASF kan ibang LGUs sa Camarines Sur. Sa walang retrato sa brgy. San Felipe, Ciudad nin Naga na inaagihan nin mga vehiculo hali sa Bombon, Magarao asin Calabanga dai man naheheling an nagbabantay asin sa toong retrato sa Baras, Canaman, CamSur parejo man an reparo kan publiko. (dpa)
Nasa ‘’red alert’’ an Provincial Disaster Risk Reduction Management Council (PDRRMC) kan Camarines Sur sagcod na nagwarak nin mga animal check point sa manlaen-laen banwaan na exit asin entrance point asin lockeddown sa mga banwaan na apektado kan African swine fever (ASF) asin maabot na sa 800 na mga ataman nin orig an pinag-depopulate.
Si Gobernador Migz Villafuerte pinangenotan an Command Center kan PDRRMC katuwang na an Departamento de Agricultura, National Meat Inspection Service, PNP, Phil Army, Kabalikat Civicom, BFP asin an mga task force sa mga lokal na gobierno.
An mga banwaan na apektado kan ASF iyo an Bombon, Calabanga, asin Magarao alagad mantang igwa nang pig-osip na nagadan na ataman na hayop sa Canaman alagad nagkua nang sample asin pighahalat an resulta kan Bureau of Animal industry laboratory sa Ciudad nin Quezon.
Sinabi ni Emily Bordado, opisyal na parataram kan DA Bicol sa banwaan nin Bombo na digdi naggikan an enot na caso sa ASF igwa nang 732 na payo nin orig an pig-depopulate mantang sa Calabanga, CamSur sinabi ni Alcalde Eduardo Severo maabot na sa cuarenta an nagkagaradan alagad segun sa DA igwa pa sindang target na sangatos na payo na ipapasa-irarum sa depopulation alagad sa lugar sana kan ground zero kan 1 kilometer radius.
An depopulation ginigibo sa paagi nin pagkuryente asin ginigibo kun banggui nganing mayong paradalan na residentes kan barangay para dai na maglakop an virus.
POSIBLENG MAGDECLARA NIN STATE OF CALAMITY
Dai hinahali an posibilidad na puedeng magdeclara nin state of calamity an Capitolyo Provincial kasunod kan kumfirmasyon na tolo nang mga banwaan sa Camarines Sur an nagpositivo na sa ASF an mga atamang na orig alagad pigbandera muna sa ‘red alert’.
Sa entrevista kan Bicol Mail sa paagi nin telepono ki Regional Executive Director Rodel Tornilla kan DA Bicol sa paagi nin telepono sinabi kaini na dai ninda hinahali na puedeng magdeclara an LGU Camarines Sur nin state of calamity.
Alagad dai na nakahalat an LGU Calabanga, CSur nagdeclara na nin state of calamity matapos maabot na sa cuarentang orig an nagkakagaradan sa tolong mga barangay huli sa ASF.
Kinumfirmar ni Tornilla na nagpuon sa sadit na banwaan kan Bombon an ASF, dai nahaloy nagbalyo sa Calabanga asin Magarao, gabos sakop kan tercer distrito kan Camarines Sur.
Apesar kan ginibong locked down sa pagtransportar kan buhay asin karning orig maging process meat alagad naglalakop na sa pagtaraig na banwaan.
An Regional Quick Response Team (RQRT) for Animal Disease and Emergencies tolos man nag-aksyon katuwang an National Meat Inspection Service (NMIS) na pinamamayohan ni Dr. Alex Templonuevo.
An DA Bicol asin an NMIS sa Bicol nagkua nin mga sample sa mga orig asin dinadara sa Bureau of Animal and Industry laboratory sa Ciudad nin Quezon asin sa resulta anas nagpositivo sa ASF.
Pig-iimplementar na kan DA an depopulation sa mga ataman na hayop na yaon sa laog kan ‘’1-7-10’’ radius control protocol asin si isasakripresyong ataman na hayop babayadan nin P5,000 cada payo alagad sagcod sana sinda sa maximum na veinte cada paraoma asin dugang na P3,000 hali sa LGU CamSur.
Sa pinaapod na press conference kan nakaaging semana kan opisina rehiyonal kan DA na kabali sa nag-atubang si Gobernador Migz Villafuerte nag-asegurar nin tabang finansyal asin nagtagama nin tig-a tres mil pesos cada payo na iyo an saindang fofondohan para sa 300 sanang payo.
Alagad sinabi ni Gob Migz na hahalaton ninda an recomendasyon ni Director Tornilla kun dapat nang magdeclara nin state of calamity nganing madagdagan an fondo.
An PDRRMC kan Camarines Sur iyo na ngonian an nakatutok sa problema nganing makontrol an paglakop kan ASF.
Nangapudan man an DA asin NMIS sa namamanuan na magcooperar sa paglaban kan gobierno ASF nganing dai na ini magparalakop. Sa imbestigasyon kan NMIS igwang nakalusot na process food sa Camarines Sur hali sa provincia kan Bulacan asin Pampanga na pighalian kan ASF. (dpa)