SA CALABANGA, CAMARINES SUR: Actividades kan Amang Hinulid, cancelado na

AMANG HINULID docientos veinteng taon na puon na darahon sa Barangay Santa Salud, Calabanga, Camarines Sur. (dpa)

Apektado kan Enhanced Community Quarantine (ECQ) an actividades asin tradisyonal na pagsungko kan ribo-ribong debotos sa bantogan asin milagrosong Amang Hinulid ngonian na semana santa sa Barangay Sta. Salud, Calabanga, Camarines Sur.

Si Alcalde Eduardo Severo nagpahayag na sainda nang iginilid si planong preparasyon sa seguridad sa prusisyon asin sa iba pang actividades sa piglalaoman na 500 mil na debotos na masungko ngonian na Juevez asin Viernes Santos sa Brgy. Sta. Salud.

An milagrosong Hinulid nag-eedad nin docientos veinte (220) años ngonian na puon na darahon sa Brgy. Santa Salud kan taon 1800 na bako lang ribo-ribong debotos an nagbibisita hali sa manlaen-laen na provincia asin ciudades maging mga turista.

Nagurulay na sinda kan simbahan catolico, nag-aataman sa Amang Hinulid, Municipal Police Station asin kan lokal na gobierno mientras na estrictong pinapasunod an lockdown huli sa coronavirus disease (Covid 19).

Kun igwa man mabisita sa Kapilya kan Hinulid bawal na an kinaugalian na paghadok asin pagkapot sa imahen envez tutugotan sana na magbabay, sabi pa ni Severo.

Namumundo an debotos sa desisyon kan simbahan asin kan lokal na gobierno alagad mayo sindang magiginibo huli kan ECQ.

Afuera pa kaini, saindang pigsusunod an Circular No. 0011, series of 2020 na pinaluwas kan Archidiocesis nin Caceres na nagtatao nin mga guia sa dapat sunodon sa celebrasyon kan semana santa huli kan Enhanced Community Quarantine.

Cancelado an mga regular na banal na misa envez sa paagi na kan live streaming asin television.

An Caceres magkakaigwa nin live coverage sa celebrasyon kan Veneration of the Cross asin an Siete Palabras sa Naga Metropolitan Cathedral sa paagi kan media mantang an mga Parokya dai na kinakaipuhan na maggibo nin suhay na Siete Palabras. (dpa)