22 na kaharongan natuprog sa kasulo

Libmanan, Camarines Sur --- Veinte dos (22) na kaharongan sa Sitio Surrender, Barangay Poblacion sa banwaan na ini an natuprog nin kalayo sa nangyaring kasulo na nagpoon mga alas 2:50 nin maagahon, Abril 21, 2025 mantang nakadamay an sarong piglalamayan na bangkay.

Sa inisyal na imbestigasyon kan Bureau of Fire Protection kan Libmanan an pag-arab-adab nin kalayo nagpoon sa nabayaan na candila sa ika-duwang escalon na residencia ni Anton Moscoso na nakadamay kan oras na ini mientras na pigbibilaran an saiyang bangkay na nagadan huli sa helang.

Alagad sinabi ni SFO2 Gerome Carino, parapahayag kan BFP Libmanan sagcod sa ngunian nagpapadagos an saindang imbestigasyon sa dakulang kasulo mantang afuera sa 22 na natuprog sa kalayo anom pang mga harong an inabot na anas partially damaged mientras na 27 familia an apektado.

Nagkaperang mga fire truck hale sa municipalidades kan segundo distrito asin Ching Po Tong Fire Brigade hale sa Ciudad nin Naga an nag-ayuda nganing makontrol an kalayo hasta alas 4:20 nin aga. Kabale man sa mga nagresponde an MPS Libmanan, PSO, asin MDRRMO.

Nagkaperang residentes sa centro kan banwaan an nagrereclamo huli ta harayo na an distancia kan BFP Fire Station sa Barangay Poblacion na yaon pa digdi an mga commercial building alagad yaon na sa Barangay Potot an fire station na iguang rayong mga cinco kilometros. Binalyo ini sa panahon ni dating Alcalde Bernard Briso. An dating estasyon yaon sana sa centro asin kun may insidente nin kasulo madaling nakakaresponde an mga bombero.

An MSWD kan LGU tolos man nagpadara nin mga ayuda sa mga apektado kan kasulo.

Mientras tanto, an Libmanan Local Youth Development Office asin iba pang grupo an nangangapodan sa publico para sa donasyon sa mga biktima kan insidente nin kasulo na nawaran nin estaran, iguang naubos si gobing na pigtawan prayoridad na makadulag sa kasulo asin hagad pa kan jovenes iba pang kaipuhan siring kan mga pagkakan, cash na puedeng darahon sa saindang opisina.

Retrato kan kamugtakan kan nasulong mga harong pinaluwas sa FB page kan Libmanan Local Youth Development Office na nagkakalap nin donasyon nganing itabang sa mga apektadong familia sa nangyaring kasulo.