3 director na nag-file COC sa Comelec buelta sa Casureco 2: NEA Memo binasura kan Corte Suprema

Pakatapos nin onseng taon na pakikipaglaban legal sa corte kan duwang director kan Camarines Sur II Electric Cooperative (Casureco II) na sinda Oscar Borja kan Bombon district asin Venancio Regolado kan Canaman district pinaboran kan Corte Suprema an saindang pakikipaglaban contra sa NEA Memorandum na nagdedeclara sa mga director kan cooperativa na awtomaticong naghilig na sa posisyon matapos magsangat nin certifico de candidatura Comelec.

Sa entrevista ki Borja saiyang kinumfirmar na sainda nang narecibe an desisyon kan SC na nagbabasura kan petition to review for certiorari kan NEA kan Febrero 11, 2025 alagad an desisyon binaba kan Noviembre 13, 2024. Si Atty. Crispo Borja iyo an nagtindog na abogado kan duwang director.

Napaboran kan desisyon kan SC iyo sinda directors Levy Sta. Ana kan Calabanga district, Raymond Opiada kan Magarao na parejong candidatong consejal sa saindang distrito asin si Borja na candidatong alcalde sa saiyang distrito.

Sinda matukaw liwat bilang director kan saindang sakop na distrito alagad mademiter sa junta oras na manggana sa eleksyon lokal asin magtukaw sa bagong posisyon lokal sa Hulyo 1, 2024.

An caso nagpoon sa Regional Trial Court sa Ciudad nin Naga kan sinda magsangat nin petisyon kan 2013 antes kan local asin national elections kan Mayo 2013 contra sa NEA Memorandum, pinaboran sinda kan jusgado alagad nagsangat nin motion for reconsideration an NEA sa Court of Appeal (CA), dai pa nakuntento sinakat pa sa SC sagcod na pinaboran man giraray an saindang petisyon na nagdedeclara na ‘‘illegal and unconstitutional’’ an memorandum kan sinambit na ahencia.

Sinda Borja bise presidente kaidto kan junta directiva kan Casureco II asin si Regolado miembro kan junta.

Sarong historico sa 121 cooperativa nin electricidad sa nasyon huli sa pakikipaglaban legal kan duwang director contra sa ‘‘illegal and unconstitutional’’ na memorandum kan NEA.

Si Borja candidato kaidto bilang alcalde kan Bombon asin si Regolado bilang bise alcalde kan Canaman. Sinda parejong incumbent directors kan saindang sakop na distrito.