3K dugang na mga botantes sa Naga para sa SK, Brgy elections
Labi sa tres mil an nakadugang sa rehistradong botantes sa Ciudad nin Naga sagcod sa ultimo dia kan pagpalista sa Commission on Election kan ciudad kan Enero 31, 2023.
Kan nakaaging national asin local elections kan Mayo 9, 2022 an ciudad igwang total na rehistradong botantes nin 119,119 asin sa ngunian igwa dugang na labi sa tres mil sagcod sa ultimo ora nin pagpalista alas cinco nin hapon, Enero 31.
Ini an mga pahayag ni Abogado Maico Julia Jr. election officer kan ciudad na dakul si mga nagharabol na mga registrants kan Enero 30, 31 alagad sa desisyon kan commission iginilid na an planong extension pa kan rehistrasyon mantang an SK asin Barangay elections pigtalaan sa Oktubre 30, 2023.
Mas dakul si mga jovenes na maparticipar sa Sangguniang Kabataan election an nagpirila sa duwang natatadang mga aldaw o antes kan Enero 31, sabi pa ni Julia.
Kan naaaging mga aldaw sa saindang opisina hababa an nagpapalista mala ngani inaabot sana nin 20 hasta 25 alagad mas nakatabang kan sinda magluwas sa paagi kan satellite registration huli ta inaabot sa sangatos na registrants nagpipila sa Barangay Hall. Afuera kaini nagkaigwa pa sinda nin kaparejong actividad sa Mall.
![](https://static.wixstatic.com/media/93486f_141ba3873e074156b2ea3f77fe1e98c8~mv2.jpg/v1/fill/w_750,h_658,al_c,q_85,enc_auto/93486f_141ba3873e074156b2ea3f77fe1e98c8~mv2.jpg)
Naghahabol na mga mapalista sa Comelec sa Ciudad nin Naga nganing makaparticipar sa nakatalaan na SK, Brgy elections sa Oktubre 30, 2023. (Ems Aureus)
Comments