8 dakop sa pagsinutil sa EO No. 39 ni Pres. Marcos

Walong rice retailers sa Bicol na dai pa nginaranan an nakatalaan mag-atubang sa penalidad na P500,000 hasta P1-milyon o pagkakapriso nin sarong taon hasta sampolong taon matapos madakop na nagsinutil sa Executive Order Number 39 ni Presidente Ferdinand Marcos sa Rice Price Ceiling sa cantidad na P41 hasta P45 cada kilo kan bagas.

Sa ginibong inspeksyon kan Bantay Presyo Monitoring Team kan Department of Agriculture, National Food Authority, Department of Trade asin DILG Provincial Office sa Naga City Public Market (NCPM) anom an nadakop na nagbalga sa EO 39 sa ginibong inspeksyon kan Septiembre 9, 2023 mantang duwa man sa ibang provincia kan rehiyon kan Septiembre 8.

Ini an mga pahayag sa Bicol Mail ni Luvella Guarin, regional information officer kan DA Bicol mantang pig-isuyuhan na sinda nin notice of violation nganing magpaliwanag sa DA asin DTI kan saindang pagsinutil sa EO 39.

An magabat na penalidad base sa EO 39 alagad magdedepende sa diskresyon kan jusgado.

Sa liwat na surprising pagbuelta kan Bantay Presyo Monitoring Team sa Naga City Peoples Mall maheheling sa retrato na nagsusunod na sa Rice Price Ceiling an rice retailers. (DA-V)

Sunod-sunod an inspeksyon kan Bantay Presyo alagad kan magbuelta sa Naga City Public Market kan Lunes, Septiembre 11 mayo nang nadakop.

Kan madakop sa akto an mga violators, an saindang paliwanag malulugi sinda kun mapabakal sa presyong P41 hasta P45 nin huli kan halangkaw man si presyo kan saindang bakalon an bagas sa mga darakulang negosyante.

Namumundo an saradit na paratienda nin bagas sa mercado mantang nag-angkat sinda nin bagas sa presyong P47 pataas ‘‘alagad ipapabakal sa hababang presyo mas marhay pang magpundo’’, sabi.

An Bantay Presyo Monitoring Team nagsabi na magpapadagos pa sinda sa mga surprisang inspeksyon.

Mientras tanto, sa Partido area igwang nagsisinutil mala ngani igwa pang nagpapabakal nin P50 hasta P53 cada kilo an dahilan halangkaw man an saindang bakal kan bagas. Maging sa Libmanan, Camarines Sur na tambubong nin paroy kan provincia igwa pang P49 hasta P50. Sa provincia nin Masbate igwa pang P52.

Ibang lokal na gobierno pig-rereclamo kan consumedores huli kan dai nagiging activo an saindang Local Price Monitoring Council. (dpa)