ACMs na gagamiton sa pirilian maabot sa Naga sa Abril 2025

An Commission on Election (Comelec) sa Ciudad nin Naga nag-aandam na sa pag-abot kan Automated Counting Machines (ACMs) na gagamiton sa 145 mga presinto sa mga barangay kan ciudad para sa nagrarani nang midterm elections sa Mayo 12, 2025.

Kinumfirmar ni Abogado Maico Julia Jr. Election Officer kan ciudad na piglalaoman ninda maabot sa ika-duwang semana kan Abril 2025.

Pag-abot kan ACMs, insigidang ilalaog sa custodia kan city treasurer’s office kan City Hall.

Padagos an saindang preparasyon kan maabot na pirilian nasyonal asin lokal mala ngani sainda nang pig-paskil sa luwas kan saindang opisina an mga pangaran nin botantes nganing amay maheling an saindang bobotohan na precinto asin escuelahan kan voting center sa barangay.

An Comelec Naga nagtapos na kan Voters Education sa mga barangay sa paagi kan pagpaheling kun panong gagamiton an makina.

Nagtalaan nang seminar/training sa mga paratukdo sa paggamit kan ACMs.

Naglalaom na magiging matuninong an dalagan kan eleksyon sa ciudad siring kan mga nakaaging eleksyon mantang yaon an miembros kan Naga City Police Office na mamantenir sa paz y orden.