Actividades politikal dapat isikwal sa graduation-DepEd

An Department of Education (DepEd) nagpahayag na an pag-inbitar nin mga candidato sa graduations maging sa moving up ceremonies dai binabawal alagad saindang pigdidisganar sa mga escuelahan huli ta panahon nin politika nganing maibitaran an isyu na nag-eendorso nin candidato.

Sinabi ni Regional Director Gilbert Sadsad kan DepEd Bicol, ‘‘dai man prohibido alagad we discouraged kasi baka gibohon na political rally an graduation. Bawal na gibohon na campaign venue an event asin magbugtak nin mga campaign materials’’

An isyung ini piglinaw ni Sadsad mantang pigtalaan na an graduation exercises sa escuelas publica sa Abril 14 asin 15, 2025.

An ibang opisyales kan Parent Teachers Association nagpasalamat sa panindugan na ini kan DepEd huli ta malawig sana an oras sa mga platica kan candidato mantang dapat mag-ikot sana an programa sa graduations. Afuera pa kaini, posibleng maging campaign rallies sagcod na mamudbod nin ayuda.

An DepEd igua nang enot na patanid sa public schools na nongka mag-envuelto sa partisan political activities sa panahon nin graduation asin moving-up ceremonies.

Kabale pa sa patanid na an arin man na opisyal kan ahencia, paratukdo saka non teaching personnel dai magcompromiso sa electioneering o actividad political sa nagrarani nang pirilian sa Mayo 12, 2025, ini base sa Memorandum 27 kan Marso 21 na pirmado ni DepEd Secretary Sonny Angara.