Adik Sa Sine

Sa istorya ni Senyor Raffy Zuniega na taga Brgy. San Miguel diyan sa Magarao asin saro sa mga namamasyar kun hapon sa SM kaulay-ulay an mga taga media asin mga retirees, saro daa sa pig hahanap niyang istorya digdi sa Calle Maduros iyo an mga buhay buhay kaidto digdi sa Naga asin kabikolan. Natural sa mga Senior Citizens na naghahanap kan mga istorya kan mga inot na panahon lalo na an saindang mga buhay buhay kaidto digdi sa Heart of Bikol ta harayo nang marhay kun ikukumparar sa buhay ngonian na henerasyon ta an gabos mina agi na sa internet asin computer. An saro sa Famoso kaidto iyo an Sinehan. Digdi sa Naga City asin pagtaraid na banwan, an mga sinehan haros pag rugaring kan family ni Victor Bichara, Sr., na sarong Lebanese na durante kan premirong gierra mundial nag alsa balutan para digdi sa Pilipinas mag tener asin pinili an Naga na iyong istaran kan familyang Bichara. An iba pang mga negociante na nagkapot man nin mga sinehan Tsino. Ngonian maski igua nang sinehan sa mga darakulang Mall arog kan SM asin Vista Mall, an mga sinehan dai nang gayo pinag pipilahan ta an mga tawo puede nang magsine sa laog kan saindang harong sa paagi nin internet asin netflix, asin puede pang maghiling nin mga bold na istorya sa cellphone bakong arog kaidtong joven pa an Naga, an mga istoryang bold, masulong sa takilya, an ibang lalaki sa mga nagpipila para magdalan haros pa sana nagsasabo an mga nguso sa grabeng pag gama-gama. Ultimong an pakipag lips to lips sana ni Divina Valencia haros marungaw na sa kalibugan an mga lalaking kulang sa karigos mantang ngonian na panahon dai na kaipuhan an sinehan para makahiling nin mga bold ta ang gabos naka buyangyang na sa cellphone. Kan kita mga aki pa, an pag dalan nin sine ki Bichara saro sa importanteng regalo kan mga Ama sa saiyang familya tuyong aldao nin Domingo. Kun an familya de kotse, an mga aki magagayon an mga bado para magsine asin an kotse naka parada sana sa tongod kan sinehan o bagaman sa may Plaza Rizal asin PNB building, alagad ngonian na panahon, deficilon na an parking sa Naga City. Nawara na an inaapod na “lagarista” an taga alsa para idalagan an rolyo nin pelikula paghale sa sarong sinehan ihahatod pasiring sa saro pang sinehan na yaon sa ibang kalye. Trabaho kaidto kan mga maysadiri nin sinehan na mag abang sa PNR tanganing kuanon an mga rolyo nin pelikula na ipinadara hale sa Manila asin an saindang komunikasyon ipinapaagi sa telegrama mantang ngonian na panahon, an gabos na transaksyon yaon na sa cellphone asin internet bawal na an magastos na long distance kaidto sa Natelco. Tama man nanggad na isablay sa abaga ni Iriginia Nora Aunor an onra komo sarong National Artist ta dakula an saiyang kontribusyon sa linya nin pelikula. Kadakol siyang mga fans na pina ogma ta an kaogmahan sa pag sine sarong medisina na nakakahale nin kulog boot o stress kaya maayahay kaidto an pag buhay kan mga bikolano. Dapat man pasalamatan sinda Dolphy asin Chiquito ta haros magka irihi na sa Kalson an mga kaakian sa kangingisi. Si Dolphy makonsuelo mag kapot nin papel na bakla, mantang si Chiquito marhay mag ganap na Mr. Wong an sarong intsik na para tienda nin puto alagad saro palan na crime buster. An sinehan dakula man an kontribusyon sa marikas na paglobo kan populasyon sa Naga ta an Balcony iyo an maogmahon na lugar nin pagka minootan ta an mga mag elosyon digdi nag iiribahan para mag sine asin mag holding hands. Si Lolo Zimo na ngonian nagtetienda nin ice cream sa zamora sa sirong kan Supermarket dai nanggad nalilingaw kan siram na saiyang namatean sa Balcony. Ta sa tanang buhay niya kan siya soltero, premiro niyang ma eksperiensta na makapugol nin kamot nin daraga sa balcony. Para ki Lolo Zimo, an kamot nin daraga maimbong, malomhok asin masiramon pag pilditon kaya sa pagluwas niya sa sinehan wilwil an dila asin nag hahalhal sa paghangos ta napapa agom nang marhay sa babaing nagtugot na darahon sa Balcony. Kung may maogma sa pagsine, igua man nin makatakot lalo na sa mga solterito ta iyo an target kan mga kakabalangon na bakla na dai man nagsisine kundi nag iistambay sa laog kan Rest Room tanganing mang gu’lok nin mga parokyalista asin atenista kaya igua nin mga solterito na pig titios an pag ihi ta natatakot sa mga bakla na mga maskulado ta iba sainda mga para ataman nin damulag, asin an iba mga kargador sa Supermarket. Barato an pagsine ta an balon iyo an salted na mani asin an tubig libre sa gilid kan tinampo. Kun an sunod na pelikula ni Bichara iyo an James Bond, iyo ini an haros orolay olay sa mga escuelahan ta an inot na makadalan kan James Bond iyo an sikat sa baryo. Makaherak man an mga pobreng aki na gustong makahiling ki James Bond ta kaipuhan pa niya na magsakdo nin tubig sa ibang harong para matawan nin sentimo asin an iba nakiki ani nin paroy tanganing ipatungod sa molihohan asin makadalan nin sine. An hapot, maibalik pa daw an sinehan ni Bichara? Sayang an kagayonan kan kaugalian na an familya nag iribahan sa pag sine, ta saindang kwarto igua na nin saditing sinehan ta iguang darakulang flat tv na nakanonektar sa internet asin libre an mga pelikula. Sayang an magagayon na takilyera ta saro sinda sa pig tatanaw kan mga gutom na aki ni Adan ta an mga takilyera mayong pinag iba sa kaseksihan nin mga artista na nadadalan sa laog kan sinehan. Sa parte kan mga Artista kaidto, pig tuga ni Action Star Gabby Casimiro na, minsan nagtuturo an saiyang luha kapag may nababasa siyang istorya kan buhay kan mga dati niyang kapartner sa pelikula. Saro sa nagpaluha sa mata ni Gabby Casimiro iyo kan mawara si FPJ, asin an mga kalaban laban niya sa suntokan na sinda Bernard Belleza, Roberto Gonzales asin Jun Aristorenas. Masiram kaidto an maging adik sa Sinehan.