Amatyur Ginaba Na Sa Plaza

Si Ice Cream King, Zosimo Villarez Alias George, na sikat sa mga tindera nin Bagasan sa sirong kan Supermarket sa bandang Zamora Street, nagpahayag kan saiyang kamunduan sa ginigibong pag distrungkar asin pag hale kan Plaza Quezon. An dahilan, dagusan nang mawawara an karantayan o Amateur sa Quezon Square ta ini gigibohon sarong business establishment. Si Zosimo na tubong Santa Cruz alagad nag migrate na Bagong Sirang diyan sa Sabang, saro sa pusikit na paradalan nin Hagyanan Sa Kabitoonan, Liberty Big Show, asin Tawag ng Tanghalan na nadadalan sa Plaza kan mga dekada 60 asin 70. Ang Amatyur iyo an nanginginot na entertainment kan mga Naguenio kasunod an mga sinehan ni Bichara asin ni Almeda. Ginigibo an karantahan tuyong Sabado nin Bangui, kaya horomokan an mga tawo sa Quezon Square, nagtitiaga na magtindog ta gustong madalan an mga matitibay na mga parakanta na hale pa sa man iba ibang lugar kan Bicol. An mga nag sikat na mga parakanta sa Plaza iyo si Imelda Papin, Nora Aunor, Bert Malaga, Neddie Decena, Cora Ross, Zenaida Olivera, asin kadakol pang iba. An saro sa matibay, asin magayon mag kanta asin naging national champion iyo si Corazon Ross na taga Sto. Nino Penafrancia alagad nag iistar na ngonian sa Las Vegas, USA. Si Cora Ross nagka igua man nin records arog kan “ Magayon” asin “Understand” sa lindong kan Bicol Express Recoreds. Kadakol an naghihinayang na dai ipinadagos ni Cora asin saiyang singing career ta yaon saiya an magayonon na tingog nin saronmg babae afuera pa kan pagiging mestiza asin seksi na ang tindog tunay na pang Superstar. An mga paradalan, iguang paboritong abangan ta makonsuelo pag dalanon, arog ninda Rose Delgado, saro siyang “Gay” pero macho ang boses ta an saiyang kinakanta iyo an mga kantang pang cowboy. Ultimong naisihan kan mga tawo iyo na si Rose Delgado nanging maestro sa CSNHS. An saro pang babae na parating champion iyo si Zeny Olivera hale sa familya nin mga parakanta asin tugang kan famosong Olivera Brothers, na iyo an bikolano Trio Los Panchos. Si Zeny Olivera, nagpadagos kan saiyang singing career duman sa Brisbane Australia. Si Zeny, bako sanang magayon mag kanta, kundi ini matibay mag bayle, magayon an lalawgon asin may sexy body. Saro siya sa tampok na singer sa mga Night Spots sa Brisbane asin paminsan minsan nag babalikbayan sa Arana Santa Cruz, an saiyang lugar na tinubuan. An pangaran na Zeny Olivera makukua sa Facebook asin duman madadangog an magagayon niyang sonata. Bakong magastos an mag dalan nin amatyur ta solamente an balon iyo an salted na mani na binakal sa plaza rizal. Lalong maogmahon an amatyur kun iguang bisitang artista kun kaya nag kukuribaw an mga tawo ta an mga artista solamente nadadalan sana sa mga sinehan kan Vic, Alex asin Albe. Maging an mga local na Announcer sa Radyo, pig aarabangan na mahiling sa Plaza, ta garo man sana sinda mga artista na pinag hahangaan. Pero an mas makonsuelo na pinag aabangan iyo an mga komedyante arog nin Andoy Pakoykoy, Ben Olleta alyas Ate Pamy, Susing, Nap asin Didoy. Ang maging contestang sa Plaza sarong orgolyosong experiencia ta deficil an makapasar sa audition ta strikto ang mga audition master na sinda Jerry Latombo asin si San Jose. Nabisto sa Plaza an band na Flamingo Combo na iyo an nag aakompanyar sa karantahan sa Quezon Square. Ang Amatyur sas Plaza, saro na sanang memorya na dai nanggad malilingawan ta iyo ini an nagtaong kaogmahan sa mga bikolano. Mayo na ang karantahan sa Plaza.