Annie Ramirez sasabaton nin magarbo sa saiyang barangay

Pamplona, Camarines Sur --- Nag-aandam na an Barangay Council kan San Isidro sa banwaan na ini nin magarbong pagsabat sa nakatalaan na pagpuli sa saiyang residencia ni Ms. Annie Ramirez na pinatos an gold medal sa Jiu-jitsu Women’s 57 kg sa nagtapos na 19th Asian Games sa Hangzhou, China matapos saiyang daogon an parakawat na si Galina Duvanova kan Kasakhstan.

Sa ngunian warak na an mga tarpaulin sa Barangay San Isidro asin sa centro kan banwaan nin Pamplona na nagpapaabot nin Congratulations sa Bicolanang atleta.

Sinabi ni Punong Barangay Dennis Tarusanan an Bicolanang Champion sa Jiu-jitsu sa Asian tubong Barangay San Isidro parati nindang sinasabat nin banda sa mga enot kaining pagpupuli na may bitbit nin gold medal sa mga international competition.

Igwa na sindang koordinasyon sa familia sa paagi kan ama na si Lorenzo 85, na dati man na instructor sa kawat na boxing.

Si Annie nagtapos sa colegio sa kursong education sa University of Sto. Tomas na libre an matricula bilang atleta. Pito sindang magturogang na nagtapos sa colegio huli kan pagiging mga atleta asin yaon na gabos sa nasyon nin Singapore nagtatrabajo mantang an jiujitsu champion sarong physical education instructor sa kaparejong nasyon.

Si Ramirez, kabali sa limang mga atletang Filipino na nakapatos nin bulawan na madelya sa nagtapos na 19th Asian Games.

Sa Facebook page ni Congresista LRay Villafuerte kan segundo distrito kan Camarines Sur nagpaabot naman nin Congratulations maging an lokal na gobierno kan municipio kan Pamplona.