Apat na bagong pumping station proj ngunian na 2024

Apat na mga pumping station naka-programa kan Metropolitan Naga Water District (MNWD) na dapat mapagibo asin maging operational ngunian na taon.

An proyecto bako lang huli kan El Niño Phenomenon envez sa tahaw kan nagdadakul na mga subdivision asin commercial building asin dagdag ini sa dati nang treinta gabos na pumping stations mantang igwa nang 58,000 na activong consumedores.

Si Jesus Salvador ‘Choppy’ Dela Cruz, opisyal na parapahayag kan MNWD nagpahayag dai palang nahahaloy operational na an Pacol 5 na nagboboga nin 50 litros cada segundo (LPS) na dagdag sa suplay nin tubig sa mga barangay kan Cararayan, Balatas, Magsaysay asin iba pang pagtaraid na barangay.

Afuera kan Pacol 5, dai mahahaloy magiging operational an Almeda pumping station na madalagan an tubig sa mga barangay kan Mabolo, Abella, asin Gainza. An iba pang isusunod iyo an Pacol 2 asin Carolina pumping station.

Dinagdag pa kan MNWD sa ngunian apektado an suplay nin tubig huli sa nagpapadagos na El Niño mala ngani an suplay nin tubig hale sa mga spring sources nagbaba na sa 25 por ciento saka 75 por ciento sa pumping stations.

An mga burabod nin tubig kan water district duwa sa Asupri, Barangay Panicuason, Ciudad nin Naga asin duwa sa Barangay Del Rosario, Pili, Camarines Sur.

An manijamiento nag-gagastos nin P15-M hasta P20-M sa cada proyecto kan pumping station.