Beuty Queen Sa Carenderia

Kun ika nag iidad sa palibot kan 70 anyos asin nagdakula sa Ciudad Nin Naga, puwes siguradong nalilipugaw ka sa mga magagayon na kadaragahan na inapod na Beauty Queen sa Karihan sa Supermarket. Minsan nagtukaw tukaw ako sa soutside of Plaza Rizal asin naki dalan ako sa mga gurang na nagsusubol nin mga Dama na iguang kadikit na pusta nin barya. Mantang nagkakawat kan dama, nadadangog ko na saindang pinag oorolayan an mga kras nindang kababaihan kaidtong sinda mga solterito pa sana kan dekada 60 sagkod 70. An saindang pig sasambit iyo an mga servidora o waitress sa mga karenderia na yaon kaidto sa 2nd floor kan supermarket na kahawig kan mga food court sa mga Mall ngonian na panahon. Naka perila kaidto an mga karihan sa 2nd floor na an mga luto masisiram na kakanon poon pamahawan , pangodtohan, mirindalan, sagkod pamanggihan. Alagad an paborito kaidto iyo an halo-halo asin an loglog na pig sasabayan pa nin juke box na an mga plaka na nag iitok sa laog kaini iyo an mga kanta ni Matt Monro, Tom Jones, Elvis Presley, Beatles,Nora Aunor, Eddie Peregrina, Victor Wood asin dakulon pang iba. Ninhuli sa higot na kumpetisyon kan mga karihan, nauso sainda an mag usar nin mga waitress na mga seksi asin magagayon ang mga lalawgon na huna mo mga artista, asin sinda ang inapod na Beauty Queen sa Carenderia. Tanganing makagulpi nin customer, an mga beauty, pinapasulot nin mga halipoton na “short pants o bagaman halapot na palda tanganing magtilam tilam an mga gutom na aki ni Adan nanag aali-aligid sa 2nd floor, kadaklan sainda, mga kargador, baggage boys, parabuno, paratienda nin sibobog asin turingan asin an iba mga drivers asin mga mandurokot asin snatchers sa supermarket. An mga aki na kapareho ko, asin mayo man nin kwarta sa bulsa tanganing mag kare, minaagi sa linyada nin mga carenderia tangani sana makanamit nin siram kan mga pugol kan mga beauties ta kasidto, an mga lalaking nag aagi sa carenderia, sinasabat, inaakbayan asin pig hoholding hand kan mga beauty queen tanganing alokon na magkakan sa saindang karihan. An mga kamot kan mga babaing ini, anas mahamot ta antes sindang mag bantay nin mga customer sa luwas, ilinoloblob sa tabo’ nin tambak nin tunaw na sabon kaya tunay na mahamot. Kadaklan sainda napangagom nin mga mayaman ta sinda magagayon alagad saro sa sikat na beauty queen kaidto iyo si Minerva na tubong Loob sa barrio kan Gainza. Si Minerva dai na nanggad naka buhi sa higot na pagbantay kan saiyang boyfriend na si Eleno na sarong kargador nin karne. Sinda Eleno asin Minerva nagka inaguman asin nagka iguang hulugan nin lote kaidto sa talahiban asin malaboy na filloville subdivision. Sa istorya ni Loloa Minerva, deficil an magtrabaho kaidto sa Carenderia ta an saro sa criteria iyo na ika super seksi asin gayon. Iyo idto an solamenteng Negosyo nin restaurant sa kinaban na an mga waitress anas magayon tanganning gamiton pang rabnot asin godgodon palaog an mga kalalakihan maski ngani sinda napamahaw pa sana sa saindang harong.