Bicol dai kaayon sa ‘‘Rice for All’’

Mayo sa listahan an Bicol sa mga nakabale sa ‘‘Rice for All’’, programa kan govierno nasyonal envez kadakle sa ciudades sa Metro Manila.

An programa kan Department of Agriculture magpapabakal kan baratong presyo nin bagas sa Php45.00 cada kilo.

Sinabi kan DA Bicol na mayong nakaayon na provincia digdi na piglalaoman kan Bicolano makakabakal na sinda nin baratong presyo nin bagas alagad mamundo an impormasyon dawa na ngani nagbababa na an presyo kan bagas sa mercado.

Si Assistant Provincial Manager Jonathan Cabrillas kan National Food Authority Camarines Sur/Camarines Norte Branch nagpahayag na bako nindang programa an ‘‘Rice for All’’ envez sa DA.

Maging sa pagsuplay nin bagas sa mga Kadiwa Center prohibido sa sinambit na ahencia huli kan Rice Tariffication Law.

P40-M danyos sa sektor agricultura sa Camarines Sur nin huli sa habagat

An Camarines Sur iyo an dakula si danyos sa produkto agricultural sa mga provincia kan Bicol na apektado kan mga pag-uran huli sa habagat asin Bagyong Carina kan nakaaging semana.

Sa datos kan opisina rehiyonal kan Department of Agriculture (DA) an Camarines Sur iyo an nagulpi kan mga pag-uran na nagcausa nin tubig baha sa ibang mga omahan asin iba pang produkto agricultural na nagkaigua nin danyos na P40 milyon, nagsunod an Sorsogon – P2.3 milyon, asin Masbate – P1.3 milyon asin Camarines Norte asin Albay parejong P1 milyon.

Kabale sa mga apektado iyo an omahan, high-value crops, asin sa fisheries.

Nag-abot man 1,867 hektarya agricultural land, na nakaapektar sa 1,602 na mga paraoma.