Birdland Sa Cabusao

Ngonian pa sana gusto kong magpa abot nin pagpa salamat sa sakuyang bilas na si Engr. Wally de la Cruz kan LGU Cabusao ninhuli sa magayon na informasyon manonongod sa pag pasyar arog nin sarong turista sa banwaan nin Cabusao. Ipinaliwanag ni Wally de la Cruz ang nag aasenso na pasyaran nin mga turista sa Cabusao, asin ini an inaapod na Birdland, halabang pang pang nin dagat kan San Miguel Bay na sakop kan banwaan. Digdi nag huhugpa an milyones na Egret, sarong klase nin gamgam na hale pa sa nasyon kan Germany. Iguang mga residentes ang naoogma na mag dakop kan gamgam alagad bawal na sinda badilon arog kan ginigibo kan mga hunters ta an gamgam iyo an famoso sa mga restaurant sa China na masiram na wild duck. Sa pag aadal kan LGU kan Cabusao tanganing aramon kung sain hale an mga gamgam asin poon pa kan saindang mga ninuno an mga ninuno man kan gamgam nag iistar na sa birdland kan Cabusao tuyong tig init ta sinda palan nagdudulag kung malipoton duman sa Germany o sain man na parte kan Yuropa. Ano ta paborito kan mga aleman na gamgam na mag istar sa Cabusao, an rason djakpot sinda sa pagkakan ta sa baybayon kan Cabusao tambak ninbalaw na iyo an pig totopsi kan mga gamgam. Aram ta man na an San Miguel Bay iyo an kadagatan na mayaman sa balaw. May kasabihan na an Diyos tunay na masuripot, ta ang gabos na bagay sa kinaban iguang pakinabang, arog kan malaboy na baybayon sa Cabusao na dai puedeng istaran nin mga tawo, dai puede sa mga ekskursyonista alagad ini palan paborito nin milyones na gamgam na hale sa Yuropa, kun kaya nagiging sarong tourist attraction an Cabusao. Apuera kan ini pasyaran kan mga turista an dalnak na beach kan Cabusao, iyo an magayon na pagkuanan nin pasayan asin kasag. Sa dagdag pang paliwanag ni Wally de la Cruz, saiyang pig biklad an ginigibong beach walk o tinampo sa gilid kan kadagatan na masumpay hale sa Mercedes Camarines Norte abot sa Barcelonita Cabusao. Oras na ini mahaman puedeng agihan nin sadit na lunadan o lakawan an beach walk asin dai na kaipuhan magsakay nin baroto tanganing magduman sa Mercedes asin maagi sa mga barangay kan Cotmo,San Vicente na anas yaon sa banwaan nin Sipocot. An siring na dalan iyo naman an ikakaag sa mga gilid na pangpang kan Calabanga magpoon sa Sabang abot sa Punta Tarawal tanganing an mga tawo puedeng mag baklay maski maisog an dagat ta sinda malakaw sana asin dai mausar nin baroto. Importante an tinampo sa gilid kan pangpang ta an mga barangay kan Calabanga na naka atubang sa San Migual Bay alagad harani sa Santa Cruz Cabusao, dai na kaipuhan mag usar nin baroto kun iguang ilulubong na paryente ta an kadaklan sa Punta Tarawal asin kataid na mga lugar nakikilubong sa sementeryo kan Cabusao na huna mo igua nin fluvial procession. Alagad kun igua nin beach walk sa lugar, kadikit na sanang distancia an babalyohon kan baroto para magpasiring sa Cabusao. Kadaklan sa mga escuela sa kostal kan Calabanga nag lulunad nin baroto tanganing mag escuela sa Cabusao. Satuyang maiimahenar kun gurano kagayon kan mga baryo sa gilid kan dagat na an mga tawo nagrarakaw sa gilid kan dagat sa paagi nin beach walk na tinampo