BIYAHENG GARO BAOO

Tigsik ko an tinampo palaog sa Bicol

Dae naaayos haloy nang panahon

Naging  gatasan kan politicong polpol

Bulok na sistema, cancer kan nacion!

Tigsik ko an mga proyektong ampaw

Pahilothilot, patapaltapal

Sa pirang taon sa puwestong masiram

Ngarahab sa bilyones na kinamkam!

An kapalmuks na politico tigsik ko man

Sa papogi points dae mapalamang

Sa tarpaulin nakalapida an pangaran

Sa mga proyektong an fundo bako niya man!

Tigsik ko an buayang pamilya

Sa pulitika an pangaran tanggurangan na

Habong matukal sa puwesto ninda

Umok-umok nin milyones an bulsa!

Tigsik ko po an aki pang si Sabel

Nagwilwil an ngabil paghalat kan tren

Haen na, hapot niya sa papoging lider

Mayo pa sa riles, enot nang nadiskarel!

Tigsik ko an oragon na si Lando

Nag-uli sa Bikol ta ma-Pasko

Huli sa biyaheng garo nang baoo

Pag-abot sa Lu’kid trangkasado!