Boksingero Sa Mercado

An mga gurangan sa Supermarket, kadakol nin mga istorya manonongod sa maogma asin makolor na buhay sa mercado. Siempre, an Supermarket sarong ejemplo nin kumunidad na dusok nin populasyon ta ini pirmeng matawo ta yaon digdi an mga kaipuhan sa oro aldao na pagbuhay. An mga nagralayas na mga lalaki ta gustong dulagan an mapagal na trabaho sa pag oma asin sa pagpalakaya sa kadagatan kadaklan napapadalagan sa mercado. An Supermarket, mahiwas, dai naiinitan , dai nauuranan kaya an mga layas o idtong mayong madadagusan mina iple sa mga gilid gilid kan supermarket sagkod na nakanood sindang maging kargador, parasigid, tindero, tindera asin kung may daindatang ugali, ini nagiging parahabon, snatcher o holdaper. Dai ko nanggad malingawan an sarong guapitong Soltero na nag abot sa supermarket asin nakipag halubilo sa mga kargador asin mga tindero. An lalaki, malinig ang hitsura, may maputing trubenais asin malinig na sapatos asin pantalon. Gulping aldao an nag agi, nagi ining alabado sa supermarket asin nagtuturog sa mga gilid gilid, ngonian dai na siya namamansayan. Minsan nakakaherak na isipon na an saro sa satuyang padangat sa buhay, nagtuturog sa maating gilid kan supermarket ta ini nawara na sa saiyang toltol na pag iisip kaya dai na nakakapuli sa saindang harong. Sa tindahan nin freskong sira asin karneseria, iguang mga lalaking mga maskulado na iyo an nagpa uso kan pag boksing. Kung mayo sindang mga gibo, saindang inaalok an mga kargador, istambay asin mga snatcher, na mag adal pag boksing tanganing arogon an sikat kaidtong filipino boxer na si Gabriel Elorde ta an pag boksing kung abotan nin suerte, kayang ihawas sa pag tios an familya. Kadakol na mga taga supermarket an nagkahilig sa boxing kaya pirmeng matawo an dating Plaza Kiosko na harani sa danlugan ni Inang Penancia harani sa tulay kan Tabuco. Nabantog kaidto an mga marhay na boksingero mga taga supermarket kaya tinatakutan an mga lalaki sa mercado ta sinda matitibay sa burontolan. Pero iba man an mga boksingero arog ni Manny Pacquiao na nag adal nin pag boksing sa sarong propesyonal na nagtutukdo asin stable o adalan nin pagboksing. An mga boksingero sa supermarket, nag aadal nin shadow boxing sa may bunuan nin orig o bagaman sa open patio na pig titindahan nin paksiw. An mga professional na boxer, nag aadal kan saiyang aro aldao na aktibidad tanganing maging matibay na boksingero. Dai sinda nin bisyo arog kan pag inom asin pag sigarilyo. Saro sa nag sisikat kutana sa linya nin boksing iyo ang sarong para baggage na maskulado ta haros maghapon ining nagguguyod nin kareta kargado nin mga batag,, kamote, niyog, bagas tanganing darahon pasiring sa 3rd floor kan supermarket. An daindata sa boksingerong idto ta sa pagsulnop kan aldao, mayo ining ginibo kundi mag ra’ra’ nin rakurak sa ibaba kan supermarket asin grabe an pagka sablok sa pancit. An saiyang rason iyo na magayon daa makibuntolan kun iguang marka demonyo sa saiyang otok, asin dapat basug an bituka tanganing makusog an tulak. Nag abot an torneo ta harani na an fiesta ni Ina, may laban si boksongero kan supermarket. Marhay ta nagkarigos man muna ini tanganing mahamot siya sa sulot niyang bathrobe na ginagamit kan mga boksngero tanganing ga’noton. Kadakol an nag dadaralan, kadakol mga para opak sa pagtubod na iyo ini sunod na magiging Cassius Clay kan supermarket. An kalaban tubong Sipocot, dai sanang girong, halata na desiplinado. Kan mag repeke na an premirong round, huna mo toro asin damulag si supermarket boy na biyong nangingisog na haros pa sana gadanon an saiyang kalaban na taga Sipocot. Antes na natapos an first round, tinamaan sa bituka an superstar, tolos ining nag orohod asin nag okro sa saiyang korner, haros dai na kaini nasimbag an 10 counts kan referee , kaipuhan na pundohon an laban ta si idol, nag susuruka sa gilid. Kan hilingon an suka, pinag haralong pancit gisado asin ginisang kandingga. An Boksingero kan supermarket, dai na nahiling sa mga paboksing sa Naga, an rason fully booked daa siya sa paghakot nin kamote pasakat sa 3rd floor.