Booster asin Covid-19 vaccine inoculation para sa Peñafrancia Fiesta

Saro an labo-labong vaccination drive kan lokal na gobyerno kan syudad nin Naga sa mga preparasyon para sa mga aktibidad katakod kan Peñafrancia fiesta sa Setyembre.

Segun ki city events protocol and public information officer Allen Reondanga, nagpadagos an booster asin Covid-19 vaccine inoculation sa syudad bilang pagpreparar sa civic asin religious activities katakod kan kapiyestahan ni Nuestra Señora de Peñafrancia na piglalaoman partisiparan kan dagmang na partisipantes nin mayo nin paghandal sa malalang epekto kan Covid-19.

Sa presente padagos an pag-ako sa mga persona na qualified magpa-booster asin magpabakuna sa mega vaccination site kan lokal na gobyerno na piglipat sa SM city Naga gikan sa JMR coliseum na pigpepreparar na man sa mga aktibidad katakod kan pyesta.

Nagpagiromdom si Reondanga sa mga debotos asin bisita sa syudad sa maabot na kapiyestahan na mapartisipar o madalan kan mga aktibidades na gigibuhon sa open area na magsul-ot nin facemask asin magsunod sa health protocols sa lindong kan alert level one na piglalaoman na magtenir sa Naga sagkod Setyembre huli sa halangkaw na vaccination coverage kan syudad na naglampas na sa 70 por syento kan nasa 200,000 na populasyon.

Apwera digdi, nangapodan an information officer sa mga kwalipikadong magpabakuna nin booster asin Covid-19 vaccine na magpabakuna tanganing bilog asin bwelo an selebrasyon kan kapiyestahan.