BUELTA BILANG ALCALDE KAN CARAMOAN, CAMSUR: Alcalde Co dai tinapos si 60 days preventive suspension

Dai na tinapos ni Alcalde Marilyn Socorro H. Co kan Caramoan, Camarines Sur an 60 diyas na preventive suspension sa saiya kan Capitolio Provincial matapos saiyang masiripan an Section 62 kan Local Government Code na kaipuhan igilid an ano man na suspension sa arin man na opisyales lokal 90 diyas antes kan eleksyon.

Ini kasunod kan suporta kan DILG Camarines Sur sa pinaluwas man na order kasuodma, Agosto 2, 2023 ni Provincial Director Julius Rodel L. Cal-Ortiz na igwang diretso an alcalde na dai taposon an preventive suspension base sa Section 62 kan LGC.

Base sa Section (c) kan ley ‘‘However, no investigation shall held within 90 days immediately prior to any local election, and no preventive suspension shall be imposed within the said period. If preventive suspension has been imposed prior to the 90 days period immediately preceding local election, it shall be deemed automatically lifted upon the start of aforesaid period’’

Sa Oktubre 30, 2023 magkakaigwa nin Sangguniang Kabataan asin Barangay Elections na segun ki Alcalde kabali ini sa sinambit na probisyon kan Local Government Code.

An jefe ejecutivo na bakong kaalyado kan Capitolio Provincial nakunsomo sana an maabot sa sarong bulan sa 60 diyas na preventive suspension.

Ini huli sa caso administrativo na sinangat sa junta provincial kan Camarines Sur kan saiyang Bise Alcalde Dyan Ramirez. Naging ugat kan caso iyo an dai pagpatukaw sa bise alcalde bilang OIC Mayor kan mayo sa saiyang banwaan si Alcalde Co. Mayoria sa miembros kan SP Camarines Sur kaalyado ni Gobernador Luigi Villafuerte.

Si Ramirez, dai naghelig sa saiyang puesto kan magbalik si Co sa opisina kan Hulyo 31, 2023. Huli kaini, nagkaigwa nin tensyon sa municipio mantang duwa na an nagtutukaw na alcalde sa magkasuway na opisina.

Sa paliwanag kan bise alcalde dai siya mahelig sa puesto sagcod na mayong order si Co hali sa Capitolio Provincial asin ki Presidente Ferdinand Marcos, Jr.

Andam siyang maghali sa opisina kun igwa na kan sinambit na order an suspendidong alcalde, sabi pa.

Si Co, nasa Nationalist People’s Coalition (NPC) na kaalyado ni Congresista Arnie Fuentebella kan Partido Area mantang si Ramirez kan PDP-Laban kapartido si Gobernador Villafuerte.