Butanding Sa San Miguel

Kapag na-uunambitan an tataramon na Butanding, minalataw sa satuyang isipan an kostal na banwaan kan Donsol duman sa Sorsogon. Dinadayo nin mga turista an Donsol ninhuli sa Butanding o mas bistod sa apod na Whale Shark. Maski ngani saro siyang klase nin pating, alagad ini bisto sa pagiging maboot ta nakikipag langoy sa mga tawo arog kan nahihiling sa Donsol Sorsogon. Sa ginibong “Research and Recreation” kan inaapod na Tres Biyaheros” na pinapamahuhan kan dating Movie Actor na si Gabby Casimero kaibanan sinda Bembot Perida asin si Randy Sto. Domingo, nagluluwas na mas dinadayo sa butanding iyo ng 4th class municipality na Oslob, sarong kostal na banwaan sa isla kan Cebu. An Oslob yaon sa sur na parte kan Cebu, asin maabot sa paagi nin tinampo sa laog nin dos oras gikan sa mayaman na Cebu City. Sa balyo kan linaw-asul na kadagatan kan Oslob matatanawan an Dumaguete City. Sigun ki Randy Sto. Domingo, kaya dinadayo an Oslob ta ini igua nin magagayon na beach resort ta an dagat kaini malinaw mala ta sa saindang paglunad sa baroto, nahihiling sa irarom an mga nag aaragi na mga sira asin mga pawikan. An Whale Shark watching tunay na Magaya gaya sa pagmati ta sigun man ki Bembot Perida, haros magturo an saiyang luha kan saiyang mahapipap asin madutaan an saros sa sampulong butanding na nakipag langoy langoy sainda. An pagduta asin paghapihap sa butanting istriktong pinag babawal sa rason na dai dapat makubhanan an butanding. Sa pag dive ni Bembot sa irarom kan dagat, maogmahon pag hilingon an pag para ngirit ngirit sa saindang atubangan kan mga butanding na garo bagang nakaka intiende sinda sa mga tawo. Sa istorya ni “action star” Gabby Casimiro, saiyang pinag hinayangan an mga aldao na aktibo pa siya sa pelikulang Pilipino bilang kapartner ni FPJ sa mga shooting sa Tondo asin Divisoria. Kun kutana uso na an butanding kaidtong mga dekada 70, siguradong aakoon niya an papel na maganap sa pelikulang “ Gabby, Ang Hari Ng Karagatan” asin hahagaron niya an pag ganap na saiyang sasangkayan sa talodtod an butanding. Sa konklusyon kan saindang pag pasyar sa banwaan nin Oslob, sinda kan Tres Biyaheros, na kaya mas gulpi an bilang kan butanding asin dai nanggad naghahale sa may baybayon kan Oslob ta sinda regular na pig babahog nin mga saradit na sira na iyo an paborito kan butanding. Antes na nauso an butanding sa Donsol, haloy na palan na igua nin butanding sa kadagatan kan San Miguel Bay. Basado man sa paliwanag ni Radio Announcer Gil de la Cruz kan OK FM asin iyo an host kan programang Birahe Chachahe, tunay na dakula asin maboot an butanding kaidto sa San Miguel Bay. Kan joven pa si Gil de la Cruz, inot niyang trabaho iyo an mag palakaya sa kadagatan para magdakop nin sira asin an ordinaryong kaulay ulay niya sa tahaw kan dagat iyo an sarong dakulang babaing butanding na saiyang pig bansagan na “ Minerva” Si Mineva, tuyong mina rani sa sindang baroto ta gustong makipag istoryahan, ini tolos nindang pig dodogkol nin sagwan asin pinapaki ulayan na magbalik sa pacifico na may bukana sa Siruma ta si Minnie o butanding iyo an saindang karibal sa pagsarap nin balaw ta si Minerva grabe kung mag supsop nin binanyerang balaw. Kan ma promote si Gil bilang Manager kan Bokatot, saro sa instruction niya sa saiyang mga empleado iyo na pakiulayan si Minerva na dai magrani sa bokatot tanganing dai ini maraot,asin an butanding tunay na maboot ta dai nanggad ini nakiki iwal sa mga para sira. Sa tuyong minapuli si Gil sa sa saiyang lugar na tinubuan na iyo an Barcelonita, dai niya mapugulan an sadiri na masdan an kadagatan kan San Miguel asin mamutawi sa saiyang nguso an pangaran ni Minerva, an babaing butanding.