Casureco 2 may pinakahababang tarifa nin kuryente sa Cam Sur

Kasunod kan paghuros kan singil sa tarifa nin kuryente kan mga electric cooperative (ECs) kan Hunyo 2024 huli kan directiva kan Energy Regulatory Commission (ERC), alagad an Camarines Sur II Electric Cooperative (Casureco II) Inc. iyo an may pinakahababang tarifa.

Alagad magdedepende sa desisyon kan ERC sa posibleng paglangkaw tarifa ngunian na Hulyo 2024 huli kan saindang resolusyon numerado 14 serye kan 2002.

Sa mga ECs Camarines Sur an Casureco II nagsisingil nin Php5.92 sa residential, Php5.05 sa low voltage, asin Php4.12 sa high voltage; sa Casureco I - Php6.88 sa residential, Php Php5.81 sa low voltage, asin Php4.95 sa high voltage; sa Casureco III – Php7.96 sa residential, Php6.62 low voltage, asin Php5.04 sa high voltage; an Casureco IV sa Partido area iyo an may halangkaw na tarifa na nag-aabot na sa Php11.77 sa residential, Php10.48 sa low voltage, asin P8.70 sa high voltage.

Si Rinner Bucay, opisyal na parataram kan Casureco II nagsabi an dahilan kan pagbaba sa tarifa kan Hunyo huli kan pagsunod kan ECs sa pinaluwas na directiva kan ERC kan Hunyo 13, 2024 mapadapit sa ‘'4 months staggered collection and payment for DUs’ WESM purchases to ease impact of high generation cost on consumers’’ asin pagpasunod nin adjustment base sa ERC resolution No. 14 series of 2022 kasugoan kan ahencia para sa gabos na mga ECs sa pag-compute nin bulanan na tarifa nin kuryente.

Kan bulan nin Abril asin Mayo nagparalangkaw si tarifa sa kuryente sa ECs sa nasyon huli kan red asin yellow alert epekto kan El Niño phenomenon na nagkukulang si suplay nin kuryente causa kan paglangkaw sa presyo kan kuryente na pinapabakal kan mga power suppliers.