CASURECO I igua nang bagong full-fledged GM

Libmanan, Camarines Sur --- Igua nang bagong permanenting general manager an Camarines Sur I Electric Cooperative (CASURECO I) matapos nombrahan na kan National Electrification Administration (NEA) si Edna M. Valerio bilang full-fledged GM karibay kan nagretiro nang dating GM Ana Sylvia M. Alsisto.

Sa simpleng seremonya si Valerio nagsumpa na sa opisina kan Lunes, Mayo 6, 2024 sa atubangan ni NEA Deputy Administrator for Electric Management Services Atty. Omar M. Mayo na ginibo sa main office kan cooperativa sa Libmanan, Camarines Sur.

Sa sinambit na programa presente an miembros kan junta directiva, opisyales asin empleados kan cooperativa nin electricidad.

An bagong GM nag-adal bilang Master in Business Administration sa UNC, 24 anyos na sa servicio hale sa pagiging ordinaryong empleado sagcod na nagpugol nin mga halangkaw na posisyon siring kan financial auditor, Human Resource and Administrative Services Department asin naging executive assistant ni dating GM Alsisto.

Sinabi ni Director Dion Romano kan Libmanan District an junta directiva nagpasar nin resolusyon na nag-nonombra sa full fledged general manager Ms. Edna M. Valerio asin kinumfirmar kan NEA matapos makapasar sa interview asin iba pang proceso contra sa iba pang siyam na mga aplikante.

Sa entrevista kan Bicol Mail, sinabi kan bagong GM na ipapadagos niya an mga programa kan cooperativa nganing mamantenir an Triple A asin ipasunod an gabos na pigmamandong pulicia kan NEA. Kabale sa saiyang plano na dapat malimitaran an mga brownout saka aadalan an mga performance kan mga department head kun kinakaipuhan.