Comelec nagtalaan nin apat na aldaw na bawal magkampanya

Apat na aldaw an pigtalaan kan Commission on Election (Comelec) na prohibido magkampanya an mga candidato lokal asin nasyonal na kinababalehan kan Abril 17 (Juevez Santo), Abril 18 (Viernes Santo), Mayo 11 (besperas kan eleksyon) asin sa aldaw mismo kan eleksyon sa Mayo 12.

Nagtutubod an Comelec Bicol sa pamamayo ni Regional Director Ma. Juana Valeza an reglamentong ini dati nang pig-iimplementar asin aram kan gabos na mga candidato sa midterm elections.

Igua sanang 45 diyas na campaign period an mga candidato lokal na nagsikad kan Marso 28, 2025 na dapat aram kan mga candidato an mga pinapasunod sa election laws nganing dai sinda madiscalificar magsunod sana, sabi pa.

Laen pa kaini, nagpatanid pa an Comelec na binabawal an mga job order asin contract of service na mga empleado nin mga local government unit (LGU) na magkampanya mientras na oras nin trabajo.

An ibang opisyales lokal na candidato ginagamit an sinambit na mga empleados sa pagkampanya kabale na digdi ginigibong parapadukot kan saindang campaign materials mientras na an sueldo ninda hale sa bulsa kan gobierno. Igua man ibang nagtatrabajo sa harong kan candidato envez na dapat aroaldaw yaon sa saiyang opisina sa LGU.

Sarong pang-aabuso an siring na gawi nin ibang politico mientras na an fondo ginagamit hale sa estado saka langtadan na pagbalga sa regulasyon kan komisyon.

An ibang mga jefe ejecutivo lokal nagnombra nin dakul na mga job order alagad inaabuso an poder sagcod na gamiton an mga JO sa pangangampanya.