CPDO kan City Hall inarestar

Inarestar kan Naga City Police Office (NCPO), bitbit an mandamiento de aresto na pig-isyu kan Sandiganbayan ki City Planning and Development Officer Wilfredo Prilles Jr. kan City Hall kan Martes na aga, Noviembre 15, 2022 alagad temporaryong nakalibre hapon kan kaparejong petsa matapos makapiyansya nin P36,000.

Saiya nang kinumfirmar sa FB Post na an caso kontra sa saiya huli kan pagbalga kan Articulo 218 kan Revised Penal Code, ini iyo an ‘‘failure of accountable officers to render account. Manonongod ini sa P450,000 na pig-cash advance para padalaganon an enot na Community-Based Monitoring System (CBMS) survey na pig-implementar kan ciudad kan 2011.’’

Saiyang pinaliwanag na bakong totoo na nagamit an sinambit na cash advance sa salang paagi. Aktwalmente, huli kan naging makaskas an pagbayad sa mga para-survey, naisakat mi sa 89% an pinal na bilang kan mga nasurvey, paghali sa dating 35% sana antes naging kaliwaan an bayad.

Pigdahilan pa iyo an mga nawarang supporting documents manonongod sa cash advance, napiritan siyang mag-abonar nin labing Php63,000 ngani sanang makumpleto an liquidation kan cash advance.

Nagpahayag pa ining kaandaman na simbagan an caso sa Sandiganbayan asin nagtutubod siya na dadangogon an saiyang lado.

Enot nang sinuspende nin sarong bulan kan Ombudsman si Prilles kan Oktubre 1, 2022 asin nakabalik na sa opisina kan Noviembre 2, 2022.

An corte nagsugo ki Alcalde Nelson Legacion na suspindiron asin naimplementar kan DILG sa Ciudad nin Naga.

An sinambit na suspension huli sa caso administrativo pa sana kan Ombudsman asin an caso criminal yaon na sa Sandiganbayan.

An caso nagpuoon kan 2011 kasunod kan Commission on Audit report na dai naglikidar kan sinambit na cantidad P450,000. Nagtutubod pa si Prilles na tatawan siya nin oportunidad kan corte nganing ipaliwanag an saiyang lado. (dpa)