CSE dapat itukdo sa senior H/S - DepEd

Sa tahaw kan controversia sa Comprehensive Sexuality Education (CSE) bill sa senado, an Departamento de Educacion (DepEd) sa Camarines Sur nagtutubod na dapat itukdo ini sa Senior High School nganing saindang masabotan an mapadapit sa sex.

Ini an mga pahayag sa media sa Ciudad nin Naga ni Salvador Pelingon opisyal na parataram kan DepEd Camarines Sur nin huli ta nagtutubod sinda na maninigo sa tamang edad itukdo an CSE.

Si Senador Risa Hontiveros, nagpapadreno nagsabi an saiyang propuestong ley tanganing matukdoan an estudiantes kan manonongod sa ‘‘sexuality, sexual health, and relationship’’. Makakatabang sa saindang kaaraman para sa saindang tamang desisyon para sa salud asin futuro. Alagad saiyang piglinaw na mayo sa propuestong bill an tataramon na ‘‘masturbation’’ na iyo an nagiging isyu sa ngunian.

Pigtutulod an ley sa tahaw kan padagos na naglalangkaw na caso sa ‘‘early pregnancy’’ sa nasyon maging an mga estudiantes dai nakakatapos nin amay sa saindang pagklase para sa saindang futuro.

An CSE makakatabang sa mga estudiantes nganing igilid ngona an amay na sexual activity, maggamit nin condom asin iba pang pagpaseguro nganing dai maging envuelto sa pang maraot na gibo.

Nagtutubod an senadora na kun maaprubaran an bill malilikay an caso sa mga amay na pagbabados kan menor de edad.