DA agricultural drone pinapalupad na sa Bicol

Sa tahaw kan mga bagong programa sa teknolohiya kan Department of Agriculture sa ngunian pigpoponan na an pagpalupad kan agricultural drone sa rice seedling, fertilizer application asin pang-spray contra sa mga peste sa omahan.

Dai palang nahahaloy naglupad na sa mahiwas na kaomahan an agricultural drone sa Virac, Catanduanes asin Polangui, Albay.

Si Luvella Guarin, regional spokesperson kan DA Bicol nagpahayag sa entrevista kan Bicol Mail an Rice Program iimplementar ngunian na 2024 dry season cropping poon Septiembre 16, 2024 hasta Marso 16, 2024 mantang target kaini an 7,600 hektaryas sa rehiyon Bicol.

An drone seeder sa paroyan kaya an diez hektaryas sa laog nin sarong aldaw na minus gastos sa paraoma sa patrabajo, sabi pa ni Guarin.

Ginibo na an drone voucher demo na pinangenotan kan DA Bicol asin kan DJI AGRAS distributor, sa Barangay Capilihan, Virac, Catanduanes.

An mga paraoma sa sinambit na banwaan masikad sa programang clustering sa 100 hektaryas na paroyan na inaalok an iba na sarabay na sinda sa pagpataruk nin paroy.

An programa kan ahencia bilang digitalization sa pag-ooma na maparikas sa mga trabajo sa mahiwas na kaomahan asin mapalangkaw pa nin ani.

An rehiyon Bicol kabale sa napili kan opisina sentral para sa agricultural drone voucher na pigtagamahan nin Php15 milyon na fondo.

An Bicol saro sa may halangkaw na produksyon nin paroy mala nganing an ibang negosyante nagsusuplay pa sa ibang rehiyon. (DPA)

Agricultural drone (DA-RV)