Dagmang na debotos padagos sa pagsungko sa 'Amang Hinulid'

Ni Paulo DS. Papa

LUNES Santo pa sana pigdadayo na nin dagmang na debotos an imahe kan Santo Entierro – bisto sa gaha na “Amang Hinulid” sa kapilya kaini sa Barangay Sta. Salud, Calabanga, Camarines Sur.

Ini an bagay na pigbuyagyag ni Geraldine Himadi – Dollero, saro sa mga caretaker kan imahen asin nagmamanehar sa kapilya na kagsadiri kan Familia Himadi asin Hilario.

Kada taon nakatuodan na kan rinibong debotos hale sa manlaen-laen na parte kan Camarines Sur magin kan syudad nin Naga na dayuhon an hinulid orog na kun Miercules Santo kun suarin ini tradisyunal na piglilinigan sa paagi kan pagpunas sa enterong imahe.

Sabi pa ni Dollero, Miercules Santo nin aga iyo ini an pagpoon kan pagdakol nin tao sa lugar para sa paglinig kan enterong imahe na mawot saksihan kan mga deboto – tanganing pagpilahan an tubig na kinarigos sa imahen na suboot milagroso, nakakapaumay kan mga helang.

Apwera pa kaini, sasanglean nin punda an hinihigdaan kan imahe magin an gubing kaini pakalihis na linigan komo pagpreparar digdi bago iprusesyon sa Viernes Santo.

An proseso sabi pa ni Dollero pupunasan an enterong imahe nin pangenot na tela tanganing haleon an ati na hale sa mga kamot kan dagmang na debotos na nagkapot na digdi pirang aldaw bago an Semana Santa.

Isusunod nang ipunas an malinig na tuwalya na ibubugtak sa tubig na iyo an pigtutubudan na nakakapaumay, pipilahan asin ipapanao nin libre segun pa ki Dollero.

Kumpyansa an caretaker na kayang imanehar kan mga nanunungdan an ruso nin tao orog na sa paabuton na Hueves Santo nin hapon sundo Viernes Santo nin aga.

AN imahe kan Santo Entierro, midbid sa gaha na Amang Hinulid sa mga debotos kaini pigdadayo na kan dagmang na bisita sa Barangay Sta. Salud, Calabanga, Camarines Sur antes an Miercules Santo kun suarin ini tradisyunal na kakarigusan asin Hueves Santo - aldaw na pipirilahan ini kasumpay kan kinatuodan na Alay Lakad. (PAULO DS. PAPA)