Dai pagkakabale sa pigdeclarang NFSE kan Albay pigrereclamo sa NFA
Nagrereclamo na sa National Food Authority (NFA) Bicol an gobierno provincial kan Albay sa paagi ni Acting Governor Glenda Ong-Bongao kun tano ta dai nakabale an saindang provincia sa mga pigdeclarang National Food Security Emergency (NFSE) for rice apesar apektado man sinda sa mga naglangkaw na presyo kan bagas sa mercado.
Alagad an pigclaro ni NFA Bicol Acting Regional Manager Julie Llenaresas dapat magcoordinar an gobernador sa Food Terminal Inc. (FTI) huli ta bako man an saindang ahencia an nagdeclara kan NFSE.
Nagrereclamo an consumedores nin bagas apesar na mahal an presyo sa mga mercado kan Albay alagad dai sinda kabale sa makakabakal nin baratong presyo kan NFA rice.
Kan Febrero 3, 2025 si Department of Agriculture Secretary Francisco Tiu Laurel nag-isyu nin Memorandum Circular No. 3 sa rekomendasyon kan National Price Coordinating Council (NPCC) na nagdedeclara nin NFSE sa mga provincia na apektado sa paglangkaw kan presyo nin bagas. Digdi sa rehiyon Bicol an mga lugar sana na kabale iyo an Camarines Sur, Camarines Norte. Sorsogon, asin Masbate mientras na dai kabale sa listahan iyo an Albay asin Catanduanes.
Huli kaini, an duwang provincia dai kabale sa awtorisado na magbakal nin NFA rice.
Sinabi pa kan opisyal kan NFA an Food Terminal Inc. iyo an nalaog sa Memorandum of Understanding sa LGUs nganing digdi sinda magbayad kan binakal na NFA rice asin an FTI iyo an nabayad kan binabayad sa suplay nin bagas hale sa NFA.
An mga provincia sa Bicol na kaayon sa pigdeclarang NFSE padagos na kan saindang pagpabakal nin NFA rice sa publico sa presyong P33.00 cada kilo.
Commentaires