Dancing Fountain Sa Naga

Kun iguang nag darakula an talinga asin nag orogma sa bareta na Numero uno palan an Naga City sa interong kabikolan kun padarakulan nin mga turista an nag iristar sa mga hotel sa laog kan Naga. Asin an Ciudad, nag ika pito sa interong pilipinas sa siring na orolay. An sabi kan mga nag ngororob-ngorob ta dai kumbinsido iyo na, makangalas na kadakol turista sa Naga mantang, goromok an trafiko, mayong toltol na parking imbes an yaon iyo an mga nangingisog na para sangal sa rueda kan wheel clamp. Sa analysis ni Randy Sto. Domingo kan dating sikat na City Newsweek, an kawaran nin toltol na parking places sa centro kan Naga, saro sa ulang sa ikaka asenso kan Ciudad. Kung iguang mga parkingan, kadakol an mga dayuhan na maoogmang magpasyar sa Naga asin makakabuelo an mga Negocio. Tano daa ta imbes na tabamgam an mga biyahero, mga dayuhan, asin, mga parasaod na makapag parada kan linadan sa centro, ini saindang pig gugo’lok sa paagi nin wheel clamp, ang resulta, naperwisyo na, nagbayad pa dahil sa wheel clamp. An suhestion ni Randy Sto. Domingo, iyo na paganahon an hotok kan satuyang mga gobernantes arog kan ibang ciudad sa Manila, na an mga bakanteng espasyo kinakagan nin mga “Parking Building” tanganing iguang vertical spaces na makaka akomodar nin gulping lunadan. Marhay na sana an mga negosyanteng sinda Alain Dy ta an bakanteng lote sa J. Hernandez ginibong mahiwas na Rent Parking Area, arog kutana kaini an kaipuhan sa ibang mga kalye sa Naga bakong ipag imot an mga gilid kan tinampo sa mga lunadan na iguang transaksyon sa Centro. Kung minsan unfair man sa mga tauhan kan PSO ta saindang naghihinanalot an mga may sadiri nin lunadan dahil sa wheel clamp mantang sinda nagsusunod sana man sa sugo nin nakakalangkaw sainda. Kaya an sabi ni “Randy”, puwes, mag eskosar kamo diyan sa City Hall, resolberan an problema sa trafiko asin parkingan sa Naga. Kan inot na mga panahon, mayo pa nin mga SM asin Robinson sa Naga, mayo pa nin LCC, Mayo pa nin Emall, alagad an mga taga Naga kuntento sa kaogmahan toyong minapasiring sa Centro. Maski sain iguang parking an Trimobile, Jeepneys, asin Karitela. Sa kada weekends, tiripon an mga taga Naga sa Plaza Quezon ta madalan nin Liberty Big Show asin Hagyanan sa Kabituonan, libre mayong bayad asin yaon an tunay na kaogmahan sa mga pangirit ninda Didoy, Nappy asin Andoy Pakoykoy. Pag abot sa linya nin sports, igua nin Inter Barangay Basketball Tournament sa Quezon Square, mala ta robo-robo an mga paradalan, maogmahon alagad mayo nin gastos bakong arog sa laog kan mga Mall, magastos asin deficil an parkingan. An mga sinehan sa Naga, tunay na nagtatao nin kaogmahan ta doble an pelikula kaya apat na oras kang papatungkaon sa laog kan orkestra, libre an turog sa laog. An lilikayan sana sa laog kan sinehan iyo an comfort room sa Lalaki, ta iguang mga sinehan na an comfort room iyo an tambayan nin ibang mga bakla sa Naga na an target iyo an mga joven na solterito. Minsan igua man pasaway na gurang na bakla na minataid sa tukawan asin pasimpleng kakanapon an birole kan kataid na solterito, pag kapkap mo, kamot kan bakla an saimong natakma kaya herak man kan mga solterito, luhay luhay na patuyatoy paluwas sa sinehan, sayang kan bayad ta dai natapos an pelikula ni FPJ. Pero minsan pa na an Naga City, naka hawig naman duman sa Paris France ta iguang magayon na dalanon asin pahingaluan sa Centro. Ini kan “Dancing Fountain” sa PNB. Kan itugdok kan Marcos Administration an PNB, kasabay an dancing fountain na dekolor asin may magagayon na tugtog tunay na nagpapaogma sa mga tawo. Maging an 15 martirez igua man nin Rotary Fountain, alagad an gabos na iyan mayo na, mapungaw na an centro kan Naga. Kung sabagay pinag ribayan man nin mga bolastog asin mga bituka nin manok. Pangapodan sa gobernantes sa Naga, ano lamang an puedeng ipagmalaki sa mga turista? Nuarin magkaka igua nin Naga City Museum na an ipapahiling iyo an historya kan Naga asin an mga kulturang bikolnon na iyo an saro sa pig tutuyo kan siisay man na dayuhan.