Darakulang festival sa Partido nakalinya ngonian na tag-init

Ni Sonny Malate

Ngonian na tag-init piglalaoman na orug pang magigin makolor, maogma asin bibo an mga banwaan sa Partido Area huli sa man-iba-ibang festival asin actividades digdi. An mga event na ini pigrorokyaw tanganing maparambong an turismo, cultura, arte, asin economia kan distrito.

Nasa ika-duwang taon pa sana an Partido Boulevard Summer Festival alagad  pig-aantabayan na kan mga residentes asin dayuhan. An makolor na festival    pigtuturowangan kan LGU kan Sagñay, Tigaon asin San Jose. Ini initiativa ni Cong. Arnie B. Fuentebella na nagbubusol kan pag-uswag kan turismo,  cultura asin economia asin pagsustenir kan kapalibotan.

An Partido Boulevard sarong coastal road na pigdadayo kan publico huli ta  harani ini sa Lagonoy Gulf,  mapresko an  duros asin tamang tama sa joggers asin bikers. Piglalaoman na magigin buhay na buhay an boulevard huli sa actividades sa festival.

Sa banwaan kan Sagñay padagos an paghatak kan famosong Baybayon Festival sa publico. Mga  bibong actividad arog kan Bikini Hunks and Babes, Binibining Baybayon Festival asin concert sa gilid kan kadagatan an  pigdadagsa kan mga hubenes. An Baybayon Festival pirang taon nang pigcecelebrar asin  padagos na sustenido ni Alkalde Jovi B. Fuentebella.

Namundag kan panahon pa ni dating Alkalde Delfin R. Pilapil, Jr. asin padagos hasta sa termino kan aki niyang si Mayor JB Pilapil, an Samhod Festival saro nang reconusidong tourism event kan Department of Tourism (DOT) arog kan Harana asin Baybayon Festival.

Ipinangaran sa One Town, One Product (OTOP) kan Lagonoy, an samhod, ini an nagtatampok kan mga gawi-gawi, arte, native sports asin pagkakan kan Lagonoy. Ngonian na taon, piglalaoman na dadagsaon ini  huli sa presencia ninda Geneva Cruz, Tom Rodriguez, Street Boys, Cueshe asin ibang celebrities.

Sa banwaan kan San Jose, pig-aanticiparan na liwat rorosoon kan publico an Motorally de San Jose  na gikan sa idea ni Alkalde Jerold B. Peña. An motorbike fun ride na pigbabalehan nin rinibong participantes  minahumale sa banwaan na ini asin minaruta sa nagkakapirang tourism destination kan Partido.

An banwaan kan Tigaon  macelebrar kan ika-323 na founding anniversary sa Abril 20-22. Ini may temang ''Kultura Padanayon, Progreso Padagoson'' 

Nagkakapira sa mga significanteng actividades iyo an street dancing, paglansar kan Sunfllower Farm, 4P's Night asin Coastal Clean-up. An advocacia kan LGU Tigaon sa turismo sa liderato ni Alkaldesa Chiqui B. Fuentebella asin suporta ni Tourism Officer Gerry P  Musa II: ''Visitahon Tigaon''

Mientrastanto, apwera sa pagpagantad kan economia, an banwaan nin Goa an nagbubusol man kan Orgulyo Festival asin celebrasyon kan founding anniversary kaini. Sustenido ni Alkalde Alfredo P. Gonzaga III asin Tourism Officer Sheila Orlina Belleza an  pagparambong kan arte, cultura asin turismo na nagcocomplemento sa progreso kan banwa.

Sa banwaan kan Presentacion, yaon an Abaca Festival tanganing itampok an productong abaca,  saro sa mayor na burabod nin revenue kan localidad. An okasyon mas nagigin maogma huli sa mga pakawat, beauty contest asin mga programang pangcultura.

Duman sa banwaan kan Tinambac pirang taon nang pigrorokyaw an  Himoragat Festival na sarong celebrasyon kan magayon na salog na yaon sa barangay Santa Cruz asin San Isidro. Durante sa okasyon, ipinapahiling kan mga residentes an mayaman na cultura na kinakawilihan kan mga dayuhan.

Sa Garchitorena pigcecelebrar man an Sisiran Festival kun saen pigtatampok an mga produkto gikan sa banwa asin an mayaman na cultura kaini. Sa Caramoan yaon dati an Carahan Festival alagad pira nang taon na naontok an celebrasyon kaini mantang an Siruma mayo nin festival.

Bulan nin tag-init, panahon kun saen maogma, magayon asin buhay na buhay an espiritu kan mga taga Partido nin huli sa mga nakalinyang okasyon digdi. MUSNAKTA SA PARTIDO!

Partido Boulevard dinagdagsa kan publico huli sa Summer Festival. (Photo - Let’s Go Partido)