DAWA IGUANG BITBIT NA DESISYON KAN SC: 3 directors kan Casureco IIdai pa pinatukaw sa junta

Dai pa pinatukaw sa board meeting kan Febrero 28, 2025 an tolong mga directors kan Camarines Sur II Electric Cooperative (Casureco II) dawa igua nang bitbit na desisyon kan Corte Suprema na pinapabuelta sinda bilang mga regular na miembros kan junta directiva matapos ibasura an Memo No. 2012-2016 kan NEA mantang dai man dapat sinda iconsiderar na ‘‘deemed resigned’’ kun nag-file nin certifico de candidatura sa Comelec.

Sinabi kan SC an ‘‘electric cooperatives are not private entities engaged in public service as electric distribution utilities. While they area regulated by the NEA, they are not government agencies and cannot be classified as GOCCs as they are owned and controlled by member-consumers, not the government.''

An tolong mga directors na candidato sa eleksyon lokal sinda Oscar Borja bilang alcalde kan Bombon, Raymund Obiada na candidato bilang consejal kan Magarao, asin John Paul Sta. Ana kan Calabanga.

Sa entrevista kan Bicol Mail ki Borja saiyang sinabi an dahilan kan saiyang pag-iriba magin ni Project Supervisor/OIC GM Edgar Piamonte na dai pa dapat sinda reconosiron mantang dai pa nakaka-recibe kan desisyon kan SC alagad piglalaoman na posibleng maka-atendir na sinda sa board meeting ngunian na semana oras na marecibe na kan manijamiento kan cooperativa an sinambit na desisyon kan pinakalangkaw na corte sa nasyon.

An caso enot sinangat sa RTC Naga ninda directors Oscar Borja na candidatong alcalde sa Bombon asin Venancio Regulado na candidatong bise alcalde kan Canaman na saindang pigcucuestion an sinambit na NEA Memo sagcod pinaboran sinda kan jusgado alagad dinara kan ahencia an petition for review for certiorari sa Court of Appeals asin SC na inabot nin onseng taon na anas nindang ginana an caso.

An desisyon binaba kan SC kan Noviembre 13, 2024 alagad narecibe kan tolong mga directors kan Febrero 13, 2025.

An isyung ini premirong nangyari sa Casureco II alagad huli kaini an mga incumbent directors sa 121 cooperativa nin electricidad sa nasyon na ma-file nin COCs makikinabang sa desisyon kan pinakalangkaw na corte sa nasyon.

Sa Omnibus Election Code, ‘’deemed resigned’’ oras na magsangat nin COCs sa COMELEC alagad ini apikable sana sa mga opisyales kan gobierno o nagkakapot nin public appointment positions, kabale an nasa Armed Forces of the Philippines asin miembros kan government owned and control corporation (GOCCs).