DAWA INAGIHAN NIN CALAMIDAD: Suplay nin bagas dai makulang

Iginilid kan Department of Agriculture sa Bicol an posibilidad na magkulang-kulang an suplay nin bagas sa rehiyon cinco matapos kan milyones peso na destroso sa tinanum na paroy kasunod kan nangyaring tubig baha huli kan Tropical Depression Amang.

Si Lovella Guarin, regional information officer kan DA nagpahayag sa entrevista kan Bicol Mail maabot sana sa 1,017 hektarya na tanuman nin paroy an nadestroso huli kan tubig baha na kun hehelingon sa datus nasa 0.74 por ciento sa 137,400 hektarya na tanuman paroy sa Kabikolan.

Sa P48.2 milyon na total na danyos sa agricultura an P8-M sa paroyan na linantopan tubig baha igwa man nagbabados dai na mapapa-kinabangan mantang igwa nang anihon na alagad maitum na si paroy.

Sa mga apektadong paraoma nasa 1,579 sa anom nang provincia kan Bicol.

Sa anom na provincia kan Kabikolan, an Camarines Sur iyo an dakula si danyos sa paroyan. Dahilan kaini, mayong peligro na magkulang-kulang an suplay nin bagas mantang igwa nang enot na nag-arani antes pa nagkaigwa nin calamidad.

Kadakli kan kaomahan sa Camarines Sur nilantopan tubig baha epekto kan makusog na bulos nin uran walat kan TD Amang. (DA-RV)

Sa isyu na pigbuyagyag kan Federation of Free Farmer’s na magkukulang nin suplay kan bagas sa nasyon dahilan kan posibleng EL Niño, alagad an solusyon digdi mantang matubig pa an kaomahan na inagihan kan TD Amang dapat tanuman na nin amay nin paroy.

An plantasyon nin maisan haros an kadakli sa provincia kan rehiyon an apektado mala ngani nagabot sa P15.2 milyon si destroso kumpara sa paroyan na P8-M na digdi sana sa Camarines Sur si na-apektaran.

An iba pang nadestroso kan calamidad sa lado nin infrastraktura sa mga provincia nin Camarines Norte, Camarines Sur, Masbate, asin Sorsogon nagaabot sa P20.5-M: sa Livestock: P126,000; sa Fisheries – P228,000 asin sa High Value Crops – P4 milyon.

Ipinahayag pa kan DA si mga apektadong paraoma tatawan nin ayuda sa banhi sa paroy, mais, fertilizer asin sa crop insurance. (dpa)