DepEd: Mga paratukdo dai mag-envuelto sa politica

An Department of Education (DepEd) Bicol nagpagirumdum sa gabos na paratukdo magin personajes kaini na dai mag-envuelto sa actividades political mantang panahon naman nin eleksyon.

Si Regional Director Gilbert Sadsad nagsabi na base sa saiyang directiva sa mga Schools Division Offices kaipuhan iimplementar an DepEd Order No. 48, prohibido sa saindang personajes magin envuelto sa electioneering asin sa actividades political. Laen pa kaini estrictong pigmamando sa regulasyon kan Civil Service Commission bako lang sa sainda envez magin sa nombradong opisyales asin empleados kan gobierno na dapat mantenido an pagiging nonpartisan para sa integridad kan saindang serbisyo publico.

Kabale pa sa pinapagirumdom an DepEd No. 9, s. 2024, EOSY rites para sa school year 2024-2025 na pigtalaan sa Abril 14 hasta 15, 2025. An mga aldaw yaon na sa laog kan campaign period sa maabot na midterm elections dapat estrictong ipasunod na nongka gamiton nin mga politico sa saindang ambisyon sa eleksyon.

Dapat ciertohan kan mga pamayo nin escuelahan na maging solemne an seremonya sa pagmidbid kan mga estudiantes sa academic achievement kan mga magraduar.

Sa mga paratukdo na maserbe sa eleksyon bilang mga board of election inspectors kaipuhan igilid na an pagbale sa BEI kun igua sindang pinsan o partidaryos na candidato sa maabot na pirilian.

An mga BEI pigtalaan kan mga lokal na Comelec na mag-agi ngona sa mga training/seminar sa saindang obligasyon orog na an paggamit kan Automated Counting Machine (ATM).