Dios Mabalos

Salamatonon sa mga may mga may sadering truck na nagdidistribuir nin inomon na tubig sa mga taga-poblacion nin tubig aga-aga ta dae kami napapaha maski mayong tubig na denideliver an Milaor Water Corporation.

Poon alas 4:00 nin aga an mga taga-Milaor nakabantay na sa saindang balcon naghahalat mag-agui an tubig Pili, tubig Capitolyo e- sakdo, Actmed, truck ni Elmer Platon kan San Fernando, truck kan sarong pulis na taga- Taban, Minalabac, truck ni Nilo Sta. Maria, jeep ni Samuel Quijano (libre kun minahulog an kuto), Rolly Dos, Parada Connection asin dakul pang iba na mina-agui sa mga barangay kan Balagbag, Flordeliz, San Roque, San Jose, Lipot, Tarusanan, Amparado, Sto. Domingo, Del Rosario, Boronborongan, San Miguel asin Alimbuyog na may darang tubig inomon na 9 pesos na an kada container.

Dakul na taga-Milaor an nagpaputol nin servicio nin tubig sa Milaor Water district asin nagpatugdok na nin gripo (deep well) alagad maski siring nagbabakal man guiraray sa mga negosyanteng truck.

An rason ta naka-eskramentar na talagang an tubig Milaor dae pwedeng inomon, maaskad, madarag asin didikit-dikit pa an bulos maski an gripo sa irarom kan kadagaan kan banwaan na panu nin bingkay dae pwede talagang inomon ta an suspetsa kan iba an banwaan na pig-aapod kan panahon na Maylaud parte kan San Miguel Bay ta ini kababan na marhay kaya an tubig madarag na, maaskad pa.

Bako lang dae pwedeng inomon, dae pwedeng ipaglaba, kun iparigos man magatol sa kublit.

An poblacion nin Milaor pano nin bingkay lalo na an mga barangay kan Del Rosario, San Jose, San Roque, Flordeliz asin Balagbag.

Sa balyong salog na kalangkawan arog kan San Antonio (dating Cumagaycay), Tacolod kan Dalipay, Capucnasan, Mayaopayawan, Cabugao, Maydaso asin Maycatmon bastante an malinig na tubig inomon na nakatakod sa banwaan nin Pili na nasa pamitisan kan bukid Isarog na pig-aapod mountain volcano.

An mga taga-balyong salog bastante an tubig na inomon hali sa irarom kan daga o sa Pili Water district asin Metro Naga Water district.

Pakatapos kan EDSA Revolution kan 1987 nagplano na kuta an lokal na gobyerno kaidto na magtakod sa Naga tanganing masuplayan nin malinig na inomon na tubig.

Huli sa kulang an kuarta nag-probar na lang na magbugtak nin tubo sa palibot kan poblacion, nag-utang kapital tangaring magka-igwang koneksyon an mga 13ng barangay sa poblacion alagad naka-utang-utang nin milyones sa Local Water Works o LUWA ( pero dae nag-asenso an servicio) kan Milaor/Maylaud Water district.

An mga kataraid na banwaan kan Naga arog kan Gainza, Canaman, Magarao,Camaligan asin Bombon nagtakod sa Metro Naga kaya magayon an saindang inomon na tubig sagkod ngonyan.

An Milaor ta nadipisilan na magprobar kuta na makipag-transaksyon sa Metro Naga Water district pero nagbago an isip.

An gusto kaya kan municipyo mag-sweldo sa Naga pero an LGU kan Milaor dae nang paki-aram maski na sa koleksyon kan bulana na bayad.

Mayong nangyari apesar na duwang eleksyon na ipinangako na itatakod na lang an Milaor Water district sa Naga. An guinibo lugod kan presenteng adminsitrasyon itinao sa pribadong kompaniya na pig-aapod Milaor Water Corporation an dating Milaor Water district.

Mayong konsultasyon pero an empleyados kan municipyo na konektado sa dating Water district nagbalik sa municipyo apuera kan mga casual na nagtatrabaho pa sa pribadong corporation alagad an reklamo ninda dae pa ninda nahihiling an saindang manager duwang taon na an nakaka-agui.

Sabi kan bagong management huli ta lapa an sistema kan ipinabakal saindang Water district kaya lapa man an servicio kaini sagkod ngonyan.

Turoklingan na. An municipyo dae nag-guiguirong silencio sana sa mga kahapotan. Sa rally na guinibo sa atubangan kan simbahan an mga opisyales lokal nagbinongog-bongogan. An miyembros kan Sangguniang Bayan nagdudurolag sa mga kahapotan kan banwaan.

An makaherak an mga consumidores na mayoriya kan mga resedintes kan banwaan kaya kadaklan nagpapa-purutol na lang nin servicio sa pribadong corporation.

An solamenteng solusyon padagos na magbarakal nin tubig hali sa mga track na nag-aagui maski nagmamahal an presyo dati 6 pesos sana an kada container ngonyan 9 pesos na. Dakula an saindang pasasalamat sa mga track pang nag-aaragui aro-aldaw na nag-didistribuir nin malinig na inomon na tubig aro-aldaw.

Sa sainda an samong pasasalamat, pagpa-Dios mabalos.

Salamatonon saindo gabos.

Muchos gracias.

TY.

Sa masunod na eleksyon an mabulos bakong tubig kundi perak na labason.

An mga nagpabaya kan saindang obligasyon ta dakul an paragastos iyo man guiraray an magarana asin maturukaw sa pwesto.