DTI NAGPATANID SA NEGOSYANTES: Limang provincia sa Bicol nagdeclara nin state of calamity

Lima sa anom na provincia kan Bicol an nagdeclara nin state of calamity huli kan bagyong Kristine na naglaila nin hararum na tubig baha. Ini kinababalehan kan Camarines Sur, Camarines Norte, Albay, Sorsogon, asin Catanduanes mantang an Masbate dai na grabe nin uran kan nakaaging calamidad.

Kun an ibang provincia haros nag-triple si bagsak nin uran base sa ‘’normal rainfall’’ kan PAGASA sa bulan nin Oktubre 2024 alagad an Masbate sa saindang dapat na normal rainfall na 203.9 MM nagkaigua sana nin 130 MM.

An mga LGUs nagdeclara nin estado nin calamidad nganing magamit an saindang calamity fund.

An Department of Trade and Industry (DTI) Bicol nagpaluwas nin patanid sa mga negosyante na estrictong iimplementar an price freeze sa mga basic necessities (BN).

Si OIC assistant regional director Joseph Ranola nagpahayag kun an sarong lugar nasa state of calamity an mga presyo kan BN ‘’automatically frozen’’ sa prevailing prices sa laog nin 60 diyas o depende kun ibababa na kan LGU.

Nag-apelar an ahencia sa mga negosyante na igilid an pagbentahe sa tahaw kan nangyaring calamidad na apektado an ribo-ribong consumedores. Dapat maging marikmat an consumedores lalo na an pagreparo sa price tags. Hinurot man na dapat isombong sa mga opisina lokal kan DTI kun iguang mga nag-oopurtunistang negosyante.

An penalidad sa mga magbabalga sa price freeze masapo nin Php5,000.00 na multa hasta sa Php1-milyon sagcod puede pang malaom sa carcel nin sarong taon hasta diez anyos.

An ahencia nagwarak na kan saindang mga enforcers poon pa kan Oktubre 24, 2024 nganing mag-monitor sa mga nagsisinutil na negosyantes.

An BN kinababalehan kan sardinas, evaporated and condensed milk, coffee refill, sabong, candila, tinapay, asin bottle water.