DTI skills training padagos na ginigibo

Ni Sonny Malate

LAGONOY, Camarines Sur --- Padagos na ginigibo an mga skills training para sa mga entrepreneurs  kan Department of Trade and  Industry (DTI) Camarines Sur sa pamamayo ni Provincial Director Jay Percival S. Ablan sa bilog na provincia.

Kan Agosto 11, an sarong aldaw na skills training ginibo para sa rattan (nawi) wall mirror making sa Covered Court kan banwaan na Lagonoy, Camarines Sur. Pagkaaga,  pigtukdo an mga aspeto theoritical, mantang pagkahapon nag-hands on an mga participantes sa paggibo kan nabanggit na items na gikan sa productong nawi.

Labing 20ng mga local entrepreneurs gikan sa mga barangay kan Lagonoy an nag-aprobechar kan skills training.

Nanotaran ni Rhea De Alday, designadong Business Counselor kan banwang Goa asin Lagonoy, na bastante an supply kan nawi orug na sa  mga bukid asin costales na barangay kan Lagonoy

Segun ki De Alday, an skills training may katuyohan na madagdagan an potential kan kagamitan kan productong nawi, afuera sa pagigin material sa paggibong basket, rocking chair, panggakot sa pag-atop kan tiklad o nipa asin iba pa.

Dinagdag pa kan Business Counselor na sa presente, an oficina ninda naghahanap na kan sistema kun paano mas haloy na mapreservar an bantog na kakanon na binanban na gikan sa Lagonoy.

Grupo nin entrepreneurs sa Lagonoy nag-atendir nin sarong aldaw na skills training kan DTI-Camarines Sur. (Photo: Rhea D. Alday)

An binanban sarong masiram na karokanon o “kakanin” na gibo sa bagas na palagadan (color violet) na giniling, linalaagan nin asucar saka buko nin niyog. Ini mapulot asin pinapatos sa dahon na inaapod na “hagikhik” sa Partido Area. 

An binanban paboritong pasalubong kan mga Balikbayan sa saindang mga kapamilya kaya kinakaipohan na mapreservar ini tanganing mabitbit sa luwas kan nacion.

Afuera sa binanban, an mga pig-oorgulyo pang kakanon kan Lagonoy iyo an ampaw, puto tabla asin tsokolate na hale sa cacao.

Mientrastanto, segun ki De Alday, sa Agosto 16, magkakaigua man nin skills training para sa bamboo lampshade making sa bawaan nin Goa. 

Sinda alkalde JB Pilapil kan Lagonoy asin Marcel S. Pan kan Goa parehong bilog an suporta sa mga skills traning kan DTI asin local entrepreneurs.

Dinagdag man ni De Alday na an DTI liwat na malatag kan  Feria de Camarines sa Agosto 16-20, sa ciudad nin Naga. Itatampok  sa trade fair na inapod “La Vida Coco” iyo an mga productong gikan sa niyog.

Sa maabot man na Bishop Francisco Gainza Trade Fair sa bulan na Septiembre, an DTI Camarines Sur magigin activo sa pagsuporta sa mga entrepreneurs na maparticipar digdi.

Sa paagi kan agenciang ini, kadakol na mga saradit na negociante an naduduholan nin asistencia sa linkages para sa dagdag capital, packaging, sales and marketing asin dakol pang mga aspeto. Ini nagigin contribuente na an saindang producto orug na mabidbid, maibenta asin masusteniran para sa pagbuhay kan pamilya asin economia kan comunidad.