Enot na semana kan campaign period sa CSur, matuninong

Pitong aldaw kasunod kan pagsikad sa 45-days campaign period poon kan Marso 28, 2025 mayo pang nangyayari insidente na may relasyon sa midterm elections sa Camarines Sur.

Sa enot na aldaw na campaign period matuninong si mga ginibong motorcade nin mga candidato lokal alagad an PNP parating nakaandam nganing maimplementar an higot na seguridad saka matuninong na pirilian, sabi ni Col. Virgilio Olalia, Provincial Director kan PNP sa CamSur.

An mga candidato naglansar kan saindang kanya-kanyang rallies, house-to house campaigns, maging sa online promotions.

An preparasyon PNP kaayon an operasyon kontra sa ano man na kriminalidad, checkpoint inspections, asin pagpatrolia nganing maibitaran an ano man na violencia asin macierto na makaboto an mga taga CamSur na libreng makaparticipar sa pirilian.

Sa report kan Comelec asin PNP apat na mga banwaan an kabale sa listahan komo nasa orange category na kinababalehan kan Tinambac, Ragay, Presentacion, asin San Fernando na boot sabihon kaini iguang nasisiripan na grupo kan rebeldeng New People’s Army alagad mayoria sa 35 banwaan asin duwang ciudades nasa green category na piglalaoman matuninong na lugar sa panahon nin pirilian.

An mga banwaan na ini padagos an ginigibong pag-monitor kan Philippine Army asin PNP sa mga operasyon sa barangay kan armadong kalaban kan gobierno.

OPLAN BAKLAS. Kasabay kan enot na aldaw na campaign period sa mga candidato lokal kan Marso 28, 2025 an Comelec sa Ciudad nin Naga nagconducir nin operation baklas kan mga poster asin iba pang campaign materials na pinadukot o binugtak luwas sa designadong common poster area. An operasyon katuwang an PNP, BFP, DPWH, asin DENR. (Oeo Naga Comelec)