EOs sa CSur nakatutok sa satellite registration

Sa paagi kan satellite registration sa mga barangay an ginigibo ngunian kan mga Election Officers pagpadagos kan voter’s registration sa Camarines Sur mantang igua na sanang 45 diyas antes magsara an mga opisina lokal kan Commission on Election sa pagpalista komo pag-andam kan mid term elections sa Mayo 2025.

An mga Election Officers iyo ngunian an saindang lakdang nganing halangkaw an por cientahe kan mapalista sa Comelec sa tahaw kan nagbababa an numero kan mga nagpapasiring sa mga opisina asin sainda nang dadarahon sa mga barangay sa paagi kan satellite registration.

Ini an directiva kan Comelec Camarines Sur sa pamamayo ni Abogado Noriel Badiola nganing madagdagan pa an pinakahuring rehistrado nang botantes kan provincia na nasa 1,312,848.

Sa mga pagserne kan listahan labi na sa siete mil na rehistradong botantes an pig-deactivate huli kan duwa nang sunod-sunod na pirilian dai nagpaparticipar sa eleksyon. Sinda si mga nagbalyong lugar, nag-abroad asin binawian na nin buhay.

Alagad pinapadarahan giraray nin noticia kan Comelec nganing mainformaran asin kun mawot magparehistro liwat antes kan Septiembre 30, 2024.

Nagpatanid an Comelec na dapat magrehistro na antes kan pagpaso sa Septiembre 30, 2024 mantang halipot na aldaw asin dai na mapalawig an commission sa tahaw kan pag-andam sa maabot na pirilian.

Nagpoon an pagpalista kan Febrero 12, 2024 na bastante an panahon nganing dai na mag-palawig nin voter’s registration.