Evacuation center ibubugtak sa Ocampo, CS

Marerealisar na an duwang escalon na evacuation center sa barangay Hibago, Ocampo, Camarines Sur matapos kan ginibong groundbreaking ceremony kan Enero 8, 2021 na pinangenotan ninda Congresista Gabriel H. Bordado Jr. kan tercer distrito kan Camarines Sur, Atty. Alfredo Lim, PAGCOR Chief Operation Officer asin opisyales lokal na pigrepresentaran ni Bise Alcalde Ely Garcia asin miembros kan Sangguniang Bayan.

An proyecto nagcacantidad nin P50 milyon nganing matabangan an mga residente na perming naka-andam an evacuation center kun nagkakaigwa nin calamidad.

Alagad hinagad ni Congresista Bordado sa PAGCOR na magbugtak man kan kaparejong proyecto sa mga banwaan kan tercer distrito nin huli ta dai nahahalian nin calamidad sa Camarines Sur cada taon envez na mag-okupar kan DepEd classrooms.

Sinabi pa kan representante kan tercer distrito kan CamSur na dapat toltol an implementasyon kan proyecto nganing mayong reclamo asin areglado sa mga ma-okupar kaini ano man na aldaw kun may maglamasa naman nin calamidad.

Yaon na sa proceso an PAGCOR sa pagpaluwas kan P50-M nganing mapunan tolos an konstruksyon kan proyecto.

Sa Ciudad nin Naga, nakatalaan iimplementar na an evacuation center sa barangay Sta. Cruz mantang napapanahon an sinambit na edificio huli kan dai nahahalian nin mga calamidad.

Natapos na si mga groundbreaking ceremony kan maabot sa onseng mga multipurpose sa mga escuelahan asin barangay sa ciudad na puede pang magamit komo evacuation center kun kinakaipuhan asin an fondo sa sinambit na proyecto hale sa infrastructure project ni Bordado base sa General Appropriation Act of 2020. (dpa)