FONDO HALE SA MALACAÑANG: P151M winaras sa paraoma sa Bicol na apektado kan El Niño

Pili, Camarines Sur --- Abot na sa Php151.850-M an naiwaras sa ribo-ribong mga paraoma saka parasira sa Kabikolan na apektado kan El Niño phenomenon sa paagi kan Department of Agriculture hale sa alokasyon kan Malacañang.

Sagcod kan Hulyo 2, 2024 katuwang an lokal na gobierno kan Sorsogon nagtao pa nin ayuda sa sinambit na sektor.

An lambang benepisyaro paraoma na rehistrado sa Registry System for Basic Sectors in Agriculture (RSBSA) nagrecibe nin Php10,000.

Alagad an ibang grupo nin paraoma na habo nang magpasambit kan saindang pangaran nagtutuyaw sa ibang opisyales lokal sa Bicol na ginagamit sa politica apesar na an fondo hale sa Malacañang.

Sa inisyal na datos an Camarines Sur na may mahiwas na kaomahan asin halaba an listahan nin mga nagrecibing paraoma iyo an may dakulang alokasyon cantidad Php50-M; Albay – Php41.55-M; Masbate – Php36.79-M; Sorsogon – P13-M; Catanduanes – Php10.23-M asin Camarines Norte – Php10,280,00.

An ayuda parte kan programa kan gobierno nganing matabangan an tios na paraoma asin parasira na apektado kan nakaaging tag-init.

Afuera pa kaini, igua nang naenot na mga fingerlings, farm machineries sa mga cooperativa asin banhi.