Giyera vs droga dapat doblehon-RD Obinque

Mantang ika-tolo sa mga rehiyon an Bicol sa mga drug affected, an bagong jefe kan Bicol PNP nagpaluwas nin directiva sa kapupulisan sa rehiyon na doblehon an saindang trabajo kontra sa ilegal na droga, alagad saiyang inomaw an ibang mga Municipal Police Station na padagos an mga operasyon laban sa droga.

Si Police Brigadier General Westrimundo D. Obinque, na nag-asumir palang bilang regional director kan PNP sa Bicol kan Febrero 28, 2023 nagsabi pa na bako lang sa ilegal na droga an dapat ipadagos an operasyon envez maging kampanya sa insurhencia asin iba pang forma nin kriminalidad nganing mamantenir an paz y orden sa rehiyon.

Kan mga nakaaging RD sa Bicol an paglaban sa droga saro man sa pigtrabajo kan kapupulisan asin PDEA, liwat ipapadagos kan bagong RD.

Siya ika-41 regional director kan PRO5 naglibot na sa mga alcalde asin gobernador maging mga regional director sa rehiyon bilang saiyang pagpabisto asin kortesiya. Saiya man tinawan prioridad na dapat magkaigwa nin marhay na relasyon an PNP asin mga LGUs, mga ahencias de gobierno asin mga stakeholder.

Sa laog kan premirong kinsidiyas niya sa puesto kan Marso 14 asin 15 maabot na sa 40 mga wanted persons an nasiod kan kapupulisan. Saiyang pig-apreciar an mga ginigibo kan saiyang mga kabuhan alagad kaipuhan maghimo nin dagdag na estratihiya nganing mahulog na sa kamot kan mga awtoridad an natatada pang mga wanted person.

Kan Marso 11 hasta 13, 2023 nag-abot sa P870,000 na cantidad nin shabu, 14 envuelto sa droga an nagkadarakop kan PNP asin PDEA sa laog nin tolong aldaw.

Ini nangyari sa Ciudad nin Legazpi, Libon, Albay, Sorsogon asin Ciudad nin Naga. Nagtutubod an jefe kan Bicol PNP na mas magiging higot pa an kampanya kan mga awtoridad laban sa sinambit na ilegal na actividad.